Менің қаламдағы ауқымды проблема

Менің қаламдағы ауқымды проблема

Қала хәлінің жақсы болуы мемлекет үшін өте маңызды. Халықтың мәселесіз өмір сүруі — басты қағидалардың бірі. Алайда, жағдайды бірден жақсарту мүмкін емес. Ол уақыт өте келе қалыптасып, жоғары дәрежеге жетеді.

Дегенмен, кей мәселелер ұзақ уақыт бойы өз шешімін таба алмауда. Меніңше, бұл мәселелерді басты назарға алатын уақыт келді.

Не себепті бұл мәселелер бізге маңызды? Осы сұраққа жауап табу мақсатында бірнеше мәселелерді қозғағым келіп отыр. Олар қоғам өмірінің жақсаруын тежеп, өмір сүру салтын қиындатуда.

Біріншіден, Түркістан облыс орталығы болғалы көркейіп, өркендегенімен, шеткі аймақтағы ауылдарда су тапшылығы әлі күнге дейін өз шешімін таппай келеді. Соның әсерінен мақта өсіретін аудандар да жапа шегуде. Мұндай жағдай мақта бағасының өсуі немесе импорттау секілді келеңсіз оқиғалардың орын алуына әкеліп соғуда. Сондықтан су — басты мәселелердің бірі! Екіншіден, ескеретін жайт — туризм инфрақұрылымын жетілдіру. Түркістан — түркі әлемінің астанасы. Мұнда біздің сан ғасырлық тарихымыз сақтаулы. Бір Қожа Ахмет Ясауи кесенесінің өзінде қаншама мықты батырларымыз бен ел билеген әділ хандарымыз жерленген. Осыған байланысты туристер санын көбейту, мәдениетіміз бен тарихымыздың ерекшеліктерімен таңдандыру бізге мол табыс пен тарихтың жаңаруына алып келмек.Үшіншіден, әлеуметтік теңсіздік және білім беру сапасындағы мәселе. Түркістан облысы — ауыл халқы көп шоғырланған өңірлердің бірі. Осыған байланысты білім беру саласында қала мен ауыл мектептерінің айырмашылығы туындауда. Негізінен мектептердің көп бөлігі ауылдық жерде орналасқан. Бірақ онда мұғалімдер жетіспеуі, интернет сапасының нашарлығы мен цифрлық сынып жабдықтарының болмауы оқу сапасына орасан зардабын тигізуде. Болашақ білімділердің қолында болғандықтан, осыған жіті назар аудару керек деп ойлаймын. Сондықтан да өзекті мәселелердің арасына енгіздім.

Қорытындылай келе, бұл мәселелердің өмірімізге маңызын байқауға болады. Бұл тек халық мүддесі ғана емес, еліміздің даму жолындағы айқын мәселелер. «Бірлік бар жерде — тірлік бар», — деп дана халқымыз бекер айтпаған. Тек өкімет қана емес, ел болып, жұрт болып осы мәселелерді шешу — мемлекет алдындағы адамзаттың парызы деп білемін. Еліміздің даму жолында төгілген әрбір маңдай тер еш уақытта елеусіз қалмайды. Өркендеу жолында бірге күресейік!

Пернешбай Жасмина

Түркістан облысы Сауран ауданы

Амангелді жалпы білім беретін мектептің

11-сынып оқушысы