МҰҚАҒАЛИДЫҢ ҚАРА ӨЛЕҢІ МЕН ҚАРАСАЗДЫҢ КИЕСІ.

Қазақ поэзиясының падишасы Мұқағали Мақатаевтың тағдыры мен шығармашылығы Қарасаздың қайнар бұлағымен, жусанды даласымен, қоңыр тауларымен біте қайнасқан. Қарасаз — тек ақынның туған жері емес, қазақ поэзиясына деген махаббатын оятқан қасиетті мекен. Табиғаты тұмса, таңы тыныш, жұрты жаны жомарт бұл ауыл Мұқағалидың жыр әлемін тұлғаландырып, рухын биіктетті.

Мұқағали шығармашылығы — адамның жан дүниесін сыршылдықпен сөйлететін ерекше құбылыс. Ол туған жерін өлеңге айналдырып, Қарасаздың әр тасы мен әр талын жырға сыйғызды. Сондықтан да қазақ халқы үшін бұл ауыл — киелі жыр ордасы, поэзияның бесігі.

Биыл республикалық кезеңде Қарасаз өңірінде тартысты жарыста бақ сынау мүмкіндігі берілді. Бұл — жай ғана байқау емес, Мұқағали туған топырақта өнер көрсету, оның рухымен бетпе-бет келу сияқты ерекше жауапкершілік. Осы сынға мен үш поэманы жаттап барып, жүрегімдегі намысты, еңбекті, ыстық ықыласты өнер арқылы жеткізуге талпындым. Бұл кезең мен үшін рухани шың болды.

Қарасаздың қасиетті табиғаты, жырмен суарылған ортасы жас талантқа шабыт сыйлады. Ауылдың әр тасы мен әр бұтағы ақынның рухын, өлеңін сездіріп, жүректі тебірентеді. Қарасазға келген әр адам Мұқағалидың ізі қалған шаңырақтан жылы леп, рухани қуат алады.

Сапардың ең маңызды сәттерінің бірі — Мұқағалидың ұлы Жұлдыз Мақатаевпен жүздесу болды. Қазақ поэзиясының мұрасын жалғап жүрген Жұлдыз ағаймен танысу, өнер жайлы пікір алмасу мен үшін үлкен мәртебе болды. Сол кездесуде алған ақ батам — өнер жолындағы сенім мен жауапкершіліктің белгісі. Бұл — жай ғана таныстық емес, рухани сабақтастықтың бастауындай ерекше сәт еді.

Қарасаз өңірін өз көзіммен көру мен үшін ең үлкен бақыт. Ауылдың табиғатын сөзбен жеткізу мүмкін емес: таулары керемет, ауасы таза, ал әр бұтағы мен шаңырағы — шабыт қайнары. Құдды бір кино әлемінде жүргендей сезіндім өзімді.

Қарасаз ақынның жырымен мәңгі жасайды. Мұқағали сөзі — жүректерді тербететін шынайылықтың үлгісі, ұлт руханиятының алтын қазығы. Ал оның ұрпағынан алынған баталы сөз — жас талантқа жол рухани шамшырақ.

Автор:Ғалымжан Аружан Серікқызы

Ыбырай Алтынсарин атындағы ЖББМ-нің 11 сынып оқушысы,Жангелдин ауданы