«Наурыз- жаңа күн, жаңа бастама»

№7 Есқайыр Халықов атындағы жалпы орта білім беретін мектепте өткен «Наурыз – жаңа күн, жаңа бастама» атты наурыз мерекесі туралы

20 наурыз күні мектебімізде тәрбие ісі орынбасарлары мен мектеп тәлімгерінің ұйымдастыруымен көктемнің жарқын мерекесі – Ұлыстың ұлы күні аталып өтті. “Наурыз – жаңа күн, жаңа бастама” тақырыбында ұйымдастырылған мерекелік шара ұлттық құндылықтарды дәріптеп, оқушылар мен ұстаздарға ерекше көңіл-күй сыйлады. Мерекелік кештің шымылдығын мектеп директоры Бейсова Майра Исламғалиқызы құттықтау сөзімен ашып, Наурыз мейрамының маңыздылығына тоқталды. Ол өз сөзінде татулық пен бірлікті, жаңару мен жасампаздықты ұлықтайтын бұл мейрамның әрбір қазақ үшін қасиетті екенін атап өтті. Шара барысында аудандық мәдениет үйінің әншісі, әрі ата-анамыз Нұрханова Жайна ханым әннен шашу шашып, Наурыз мерекесімен құттықтады. Оқушылар мен мұғалімдер әсем ән шырқап, мың бұрала би билеп, жиналған көпшілікке көтеріңкі көңіл-күй сыйлады. Сондай-ақ, оқушылар ұлттық ойындарға белсене қатысып, өзара сайысқа түсті. Арқан тарту, асық ату, қол күрес, қазақша күрес сынды ойындар арқылы балалар ұлттық дәстүрлерді сезініп, қызықты сәттерге куә болды. Мерекенің ең қызықты сәті – ұлттық тағамдардан дәм тату болды. Дастарханға наурыз көже, бауырсақ, шұбат, құрт сынды қазақтың дәмді тағамдары қойылып, балалар мен қонақтар Наурыз дәмінен ауыз тиді. Бұл күн – тек мереке емес, ұлттық салт-дәстүрді дәріптейтін тағылымды сабақ болды. Оқушылар қазақтың ұлттық мәдениетіне деген қызығушылықтарын арттырып, мейрамның шынайы мәнін ұғынды. Осындай думанды шаралар алдағы уақытта да өз жалғасын табатыны сөзсіз! Ұлыс оң болсын, ақ мол болсын!