Әз Наурыз

Әз Науырыз келді міне, көктемің

Осы болар бар қызыққа бөккенің.

Далам төрі ән мен күйге бөленді

Самал желдің қарды ертіп өкпегі.

Кәрі де жас маңғазданып басып паң,

Бүлкілдейді бойларында тасып қан.

Жылғалардан шұбырады бұлақтар,

Жолаушыдай көрісуге асыққан.

Ақ ниеттер жақсылыққа үйлесіп,

Тербетілер көңілдегі жыр бесік.

Бойы балқып жасанады ақ қайың,

Таранады арудайын күй кешіп.

Сән-салтанат, қызық,думан айналам

Берекеге қазығымды байлағам,

Наурыз көже-бойыңа құт дарытар,

Ауыл үйдің қазанында қайнаған.

Белгілі ғой өкпе наздың жатпасы,

Самарқанның ерігенде көк тасы.

Шашылады көкте Күннің шуағы,

Ашылады жүректердің қақпасы.

Жан болмысы жұтап тұрған қоғамда,

Ажырмай тамырымнан қалам ба?

Наурыз той сенің орның бөлек қой

Ұлттық рух сілкінетін санамда.

Жадырайды бір серпіліп жаныңыз,

Қауқылдасып қауышамыз бәріміз.

Жамиғаттың жүрегінде сен барсың,

Табиғаттың төл мейрамы Наурыз.