"Өмір қымбатсың маған!"

№ 18ОМ оқушысы

Бауыржанқызы Еркеназ

ЭССЕ

«Өмір қымбатсың маған»

Өмір – адам баласына берілген ең қымбат қазына. Ол қайталанбас, ерекше, қымбат. Адамның өмірі – Жаратқанның сыйы! Бірақ, өкінішке орай, көп адам бұл әлемге не себепті келгені туралы ойлана бермейді. Өзінен кейін саналы ұрпақ қалдыруға ұмтылмайды.

Адамдар қымбат тастарды бағалайды. Сол тасты көзінің қарашығындай сақтайды. Ал күнделікті өмірде қалай өмір сүріп жатқанына мүлдем дерлік мән бермейді. Уақытын бос өткізіп, теледидардың адында жатады. Бір күні сәті түсіп “Бұл өмірге не үшін келдім? Маған өмір не себепті берілді?” деген сауал қойылады. Жарық дүниені көру бақыты бұйырған екен. Оның бекер еместігі сөзсіз. Яғни біздің өміріміздің бір мәні бар. Өмір адамға бір рет қана беріледі. Әйгілі жазушы Островский айтпақшы, оны артымызға қарағанда өкініш болмайтындай етіп сүруіміз керек.

Мақсат – өмірдегі ең басты нәрсе. Ол армандарға ұмтылып, қалауыңды орындау дегенді білдіреді. Ол әр адамда әртүрлі болуы мүмкін. Бірақ, ол міндетті түрде болуы тиіс. Ол жоғары деңгейде, барша адамға пайда алып келетіндей болуы тиіс. 

Адамның не нәрсеге ұмтылатыны маңызды емес. Ең бастысы, ол мақсаты орындалуға лайық екенін білуі керек. Сол кезде ғана оның өмірі мәнді әрі мағыналы болады. Гете айтпақшы, “Пайдасыз өмір өліммен тең”.
Біреулер үшін отбасы құрып, дүниеге сәби әкелу өмірлік мақсаты болуы мүмкін. Ол бар жақсысын балаларына беруге тырысады. Енді біреулері өзін белгілі бір іске арнауды жөн көреді. Мансап жолында ілгерілеп, алға ұмтылады. Ақша үшін емес, адамдардың игілігі үшін осылай жасаса, оның дұрыс бағытта келе жатқаны.

Адамның өмірге не себепті келгеніне бірауыз сөзбен бірден жауап беру қиын. Көптеген философ, ойшыл, жазушылар өмірлерін адамзат тағдырындағы жұмбақты шешуге арнаған болатын. Олардың әрқайсысы өз еңбегінен өмірдің мәнін ұғынды.

Өмірдің мәні сіз үшін неде болса да, оның қымбат екені сөзсіз. Өмір бір-ақ рет беріледі. Сол себепті, оны бос нәрсеге жұмсамаған абзал деп ойлаймын. Бастысы бақытты болыңыз!