Тақырыбы: «Ою-өрнек – ұлт мұрасы»

Мақсаты:

Балаларға ою-өрнек туралы түсінік беру, олардың түрлерін ажыратып, ұлттық мәдениетке деген құрметті қалыптастыру. Қолөнерге деген қызығушылығын арттыру арқылы шығармашылық және танымдық қабілеттерін дамыту.

Міндеттері:

• Танымдық дағдыларды дамыту: Ою-өрнектің тарихын түсіндіру, түрлерін таныстыру.

• Шығармашылық дағдыларды дамыту: Ою-өрнек жасауға баулу, ұлттық мәдениетке қызығушылық ояту.

• Коммуникативтік дағдыларды дамыту: Топпен жұмыс жасау, бір-бірін тыңдау, өз ойын еркін жеткізу.

• Денсаулық дағдыларын дамыту: Ұқыптылыққа, еңбексүйгіштікке тәрбиелеу.

• Әлеуметтік-эмоционалдық дағдыларды дамыту: АКТ көмегімен ақпарат алу, оюларды құрастыру.

Ресурстар:

Интерактивті тақта (ою-өрнек түрлері, ұлттық бұйымдар), қағаз, желім, қайшы, киіз үй макеті, ұлттық киімдер, оюланған ыдыстар, көрпелер, сандық.

Іс-әрекет барысы:

I. Кіріспе бөлім (АКТ, Коммуникативтік дағдылар)

Балалар Құрманғазының «Сарыарқа» күйінің ырғағымен ортаға шығып, қонақтармен амандасады.

Интерактивті тақтадан ұлттық бұйымдардың, ою-өрнектердің суреттері көрсетіледі.

Тәрбиеші:

– Балалар, айналамызға қараңдаршы, қандай ұлттық бұйымдарды көріп тұрсыңдар?

(Балалардың жауаптары: көрпе, сандық, кілем, сәукеле, қамзол, ыдыстар және т.б.)

– Ою-өрнектерді қай жерлерден көреміз?

(Балалардың жауаптары: киімдерде, кілемде, ыдыстарда, үйлердің қабырғаларында және т.б.)

– Ою-өрнектер қандай топтарға бөлінеді?

(Балалар: өсімдік тектес, аң-құс бейнелі, геометриялық және т.б.)

Жаңылтпаштар:

Арай: Ою, ою керек,

Бояуы қою болу керек.

Мақсат: Ойналмаған ойын бар,

Ойылмаған ою бар.

Мақал-мәтелдер:

Алау: Ою ойғанның ойы ұшқыр.

Аяулым: Ою ойған – сызу да сызады.

Тәрбиеші:

– Өте жақсы! Ал енді ою-өрнектердің шығу тарихына тоқталайық.

II. Негізгі бөлім (Денсаулық, әлеуметтік-эмоционалдық дағдыларды дамыту)

1. Ою-өрнек тарихы (аңыз әңгіме)

Ерте заманда адамдар табиғаттағы әртүрлі бейнелерді киімдеріне, бұйымдарына салып, олар арқылы өз ойларын жеткізген.

Аңыз:

Ертеде алысқа ұзатылған қыз ата-анасына оюлы орамал жіберіпті. Оның орамалында ұшқан құс пен бүршік атып келе жатқан гүл бейнеленген екен. Мұны көрген ата-анасы:

– Қызымыз еркін, бақытты өмір сүріп жатыр екен, – деп қуаныпты.

Кейінгі орамалында бүрмеленген шеңбер мен отырған адам бейнеленіпті. Мұны көрген ата-анасы:

– Қызымыз еркіндігінен айырылып, қиындап қалған екен, – деп уайымдапты.

Осылайша, ою-өрнек ерте заманнан бері адамдардың көңіл-күйін білдіру құралы болған.

2. Зерттеу орталығы: «Киіз басу»

Интерактивті тақтадан жүнді тазалау және бұйым жасау жолдары көрсетіледі.

Тәрбиеші:

– Балалар, жүннен қандай бұйымдар жасалады?

(Балалардың жауаптары: кілем, текемет, алаша, киіз үй жабындары, дорбалар және т.б.)

– Киіз қандай қасиеттерге ие?

(Балалар: жылы, берік, экологиялық таза, денсаулыққа пайдалы.)

Тәжірибе:

Балалар жүнді қолмен басып көреді, оюларды киіз бетіне орналастырады.

3. Ойын: «Ою-өрнекті құрастыр»

Шарты: Балалар қиылған ою бөліктерін құрастырып, атын атайды.

4. Сергіту сәті:

Қимылмен көрсету:

Қолдарын көтеріп, толқын жасап ирек оюды бейнелейді.

Қолдарын айналдырып, ботагөз оюын көрсетеді.

5. «Сиқырлы оюлар» ойыны

Шарты: Балалар кубик лақтырады. Қай ою түсті, соны атау және кілемше бетінен тауып, сол оюдың үстіне тұру.

6. Шығармашылық жұмыс:

Балалар қағаздан сәукеледегі ою-өрнектерді қиып, желімдеу арқылы жасайды.

III. Қорытынды бөлім

Талқылау:

– Киізге оюларды не үшін салады?

– Ою-өрнек бізге не білдіреді?

Балалар өз жұмыстарын көрмеге қояды.

Жалпы күтілетін нәтиже:

• Балалар оюдың тарихын, түрлерін ажыратады.

• Оюларды құрастырып, мағынасын түсінеді.

• Қол еңбегі арқылы шығармашылықтарын дамытады.

• Ұлттық өнерге құрметпен қарайды.

Қорытынды:

– Балалар, бүгін біз не үйрендік? Ою-өрнектің маңызын түсіндік пе?

(Балалардың жауаптары.)

Тәрбиеші:

– Әрқашан ұлттық құндылықтарды бағалап, ата-баба өнерін жалғастырыңдар!

Ән: «Оюлар» (балалар ән шырқайды).