Педагог-ассистент – инклюзивті білім берудің маңызды тұлғасы

Қазіргі білім беру жүйесінде инклюзивті оқытудың маңызы артып келеді. Ерекше білім беруді қажет ететін балалардың сапалы білім алуына қолайлы жағдай жасауда педагог-ассистенттің рөлі ерекше. Педагог-ассистент – мұғалім мен білім алушы арасындағы байланысты қамтамасыз ететін, оқушының оқу процесіне толыққанды қатысуына көмектесетін маман.

Педагог-ассистенттің негізгі міндеті – ерекше білім қажеттілігі бар оқушыларға оқу барысында қолдау көрсету. Ол оқушының жеке мүмкіндіктерін, психологиялық және физиологиялық ерекшеліктерін ескере отырып, оқу тапсырмаларын орындауға жәрдемдеседі. Сонымен қатар, педагог-ассистент сабақ кезінде тәртіп сақтауға, оқу материалын түсінуге, тапсырмаларды бейімдеуге көмектеседі.

Бұл маман мұғаліммен тығыз байланыста жұмыс істейді. Сабақ жоспарын орындауда, оқыту әдістерін таңдауда, оқушының жетістігін бақылауда педагог-ассистенттің көмегі зор. Ол баланың өз-өзіне деген сенімін арттырып, сыныптастарымен қарым-қатынас орнатуына ықпал етеді.

Педагог-ассистент тек оқу процесінде ғана емес, оқушының әлеуметтік бейімделуіне де үлес қосады. Мектептегі іс-шараларға қатысуына, өз ойын еркін жеткізуіне, ортаға сіңісуіне қолдау көрсетеді. Бұл баланың тұлғалық дамуына оң әсер етеді.

Қорытындылай келе, педагог-ассистент – инклюзивті білім берудің ажырамас бөлігі. Оның кәсіби шеберлігі мен адамгершілік қасиеттері ерекше балалардың білім алуына тең мүмкіндік жасап, қоғамда өз орнын табуына жол ашады. Сондықтан педагог-ассистент мамандығын дамыту – білім беру саласының маңызды бағыттарының бірі болып табылады.

Назашева Самал Махсотовна
БҚО.Орал қаласы.Қаратөбе ауданы

Мұхит атындағы жалпы орта білім беретін мектебі.
педагог-ассистент.