ҚАЗАҚ МИФОЛОГИЯСЫНА ТЫҢНАН СҮРЛЕУ САЛҒАН

ҚАЗАҚ МИФОЛОГИЯСЫНА ТЫҢНАН СҮРЛЕУ САЛҒАН

«Серікбол Қондыбай - азғантай жылдарда, қиыр шалғайда жатып, қазіргі біздің бүкіл планеталық гуманитарияда ешкім тәуекел ете қоймаған тақырыптарға барып отыр».

Әбіш Кекілбаев

Бүгінде «Серікбол Қондыбай», «қазақ мифология» ұғымдары егіз ұғымдай көрінеді маған. Жоғарыда Әбіш Кекілбайұлы атап өткендей, санаулы уақытта, «бүкіл» планеталық гуманитарияда өз есімін қашап жазып, адамзат баласына жол сілтер еңбектері қазіргі ұрпақтың көз алдында. 27 жасында тағдырдың тәлкегіне тап болып, арбаға таңылып, біржола отыруға мәжбүр болды. Тоғыз жыл өмірін арбада отырып, айшылық жерден сұратып алдырған кітаптарды оқып, зерделеп, өлшеулі өмірін ғылымға арнады.

«Арғы қазақ мифологиясына» ден қойып, қазақ мифология ғылымына «арбада отырып-ақ» феномендық үлес қосты.

Қарақия ауданының іргелі білім ордаларының бірі «Құрық орта мектеп-гимназиясында» қазақ мифологиясына тыңнан сүрлеу салған дара тұлға Серікбол Қондыбайұлының құрметіне «Серікболтану» кабинеті ашылды. Арнайы ұйымдастырылған шараға Серікбол Қондыбайұлының апасы Балсұлу Қондыбай мен өңіріміздің «Серікболтанушы» ғалымы, Мұрат Ақмырзаев келіп, ашылуына қатысты.

Қазақ Ұлттық университетін географ-геоморфолог мамандығы бойын­ша бітірген Серікбол Қондыбай алды­мен мектепте ұстаз болып, кейін Маңғыстаудың мұражай, қорығында, өңірдің экология және биоресурстар басқармасында жұмысын жал­ғастырды. Осы жылдары туризм, ланд­­шафт эстетикасы тақырыптарына, шежіре, аңыздар мен ертегілерге, жер-­су атаулары мен оларға қатысты аңыз­дар­­ға, деректерге, сондай-ақ әр­бір сөз бен ұғымн­ың этимология­сы­на қызығып, өз­ бе­тін­ше зерттеу жұмыс­тарын бас­тады.

– Серікболдың мүгедек арбасы­на отыруы менің жұмысымды, жауап­кершілігімді арттырды. Ол іздеген, сұраған кітаптарды іздеп, ел асып-жер асып тыным таппайтын едім. Әзер дегенде тауып әкелген бірқатар кітап­тарым­ды бетін ашып қарап, мынау өзгер­тіл­ген деп, жауып тастайтын. Кейін бауырым өмірден өткен соң, оның мұра­ларын жинақтап, көздің қара­шы­ғын­дай сақтау менің міндетім болып қалды, – дейді апасы Балсұлу Қондыбай.

Сондай-ақ жиын барысында өлкеміздің белді ғалымы, «Серікболтанушы» Мұрат Мырзағалиұлы Серікболдың ғылыми негіздегі феномендік болжамадарын оқушыларға, келген қонақтарға әсерлі етіп талдап берді. Жиын оқушылардың сұрақ-жауаптарына ұласып, оларға ғалым және апасы Балсұлу Қондыбайқызы тарапынан толыққанды жауаптар берілді.