Қазақстан — көпұлтты, көпконфессиялы мемлекет. Елдің тыныштығы мен тұрақтылығы – түрлі ұлт пен дін өкілдерінің тату-тәтті өмір сүруінде, бір-біріне құрметпен қарауында жатыр. Мемлекетіміз тәуелсіздік алғаннан бері рухани келісімді, дінаралық және ұлтаралық татулықты басты құндылықтардың бірі ретінде қарастырып келеді. Қазақстандағы рухани келісім — жай ғана ұран емес, бұл нақты саясаттың, қоғамдық сананың және мәдениеттің ажырамас бір бөлігіне айналды.

«Рухани келісім»— адамдардың діни, ұлттық, этникалық және мәдени айырмашылықтарына қарамастан, бір қоғамда бейбіт және татулықта өмір сүруі. Бұл – өзара құрмет, түсіністік және сабырлық негізінде дамитын әлеуметтік-мәдени процесс. Қазақстан жағдайында бұл ұғым ерекше маңызға ие, себебі елімізде 130-дан астам ұлт өкілі және 18-ден аса діни конфессия бар.

Меніңше, қазақ халқы әрдайым толеранттылық пен өзге көзқарасты қабылдауға бейім болған. Көшпенділер мәдениеті, ислам діні, кеңестік кезеңдегі ұлттар достығы идеясы – барлығы қазіргі рухани келісім саясатына әсер етті. Тәуелсіздік алғаннан кейін Қазақстан жаңа тарихи жол таңдады: бұл — ашықтық пен конфессияаралық үйлесімділік жолы.

1992 жылдан бастап Қазақстанда жыл сайын 18 қазанда Рухани келісім күні атап өтіледі. Бұл күн – бірлікке, төзімділікке және бейбітшілікке шақыратын мереке. Ол тек діни келісімді емес, сондай-ақ жалпы адамгершілік пен рухани құндылықтарды дәріптейді деп санаймын. 

Қазақстанның Тұңғыш Президенті – Елбасы Нұрсұлтан Назарбаевтың бастамасымен 2003 жылдан бастап Әлемдік және дәстүрлі діндер лидерлерінің съезі өткізіліп келеді. Бұл – Қазақстанның әлем алдында дінаралық диалогты дамытудағы бастамашы рөлін көрсетеді. Съезд діни төзімділікті нығайтып, әртүрлі дін өкілдерінің бейбіт қатар өмір сүруіне ықпал етеді.

Қазақстанда Діни бірлестіктермен байланыс жөніндегі агенттік, Қоғамдық келісім комитеті, Қазақстан халқы Ассамблеясы сияқты ұйымдар да осы бағытта белсенді жұмыс атқарып келеді. Бұл құрылымдардың барлығы дін мен ұлт өкілдерінің ынтымақтастығын қамтамасыз етуге бағытталған.

Қоғамда рухани келісімнің орны ерекше. Ол тек мемлекет пен дін арасындағы қарым-қатынас емес, сонымен қатар адамдардың бір-біріне деген қарым-қатынасында көрінеді. Мектептерде, жоғары оқу орындарында толеранттылықты, ұлтаралық және конфессияаралық келісімді тәрбиелеу жұмыстары жүйелі түрде жүргізілуде. Әртүрлі форумдар, дөңгелек үстелдер, конференциялар арқылы жастар арасында бейбітшілік пен келісім идеялары насихатталады.

Әлемде діни экстремизм мен радикализм қауіптері артқан кезде, рухани келісімді сақтау бұрынғыдан да маңызды бола түсті. Интернет пен әлеуметтік желілер арқылы тарап жатқан теріс идеологиялар, әсіресе жастарды теріс жолға итермелеуі мүмкін. Сондықтан Қазақстанда діни сауаттылықты арттыру, дәстүрлі құндылықтарды қолдау, отбасылық тәрбиені күшейту сияқты шаралар қолға алынуда.

Қазақстандағы рухани келісім – көпұлтты және көпконфессиялы қоғамымыздың берік негізі. Ол — бейбітшілік пен тұрақтылықтың, даму мен өркендеудің кепілі. Осы келісімді сақтау – тек мемлекет пен дін өкілдерінің ғана емес, әрбір азаматтың ортақ міндеті. Өйткені рухани келісім – жүректен басталатын ұлы күш.

Жетекші: аға оқытушы Мұқан Нұрзат

Орындаушы: ҚазҰу-нің философия және

Саясаттану факультетінің 3 курс студенті: Сагымбаева.Е.М