Қазақтың бас ақыны

Қазақтың бас ақыны-Абай.

Ұлы ақын, дана ойшыл, қазақтың жаңа тарихи дәуіріндегі реалистік жазба әдебиетінің атасы, Абай Құнанбайұлына 175 жыл. Ұлы Абайды «Қазақтың бас ақыны» деп бағалап, оның ақындық зор тұлғасын дәл сипаттап, әдебиет, мәдениет пен қоғамдық ой-санамыздың дамуындағы орасан зор маңызын тұжырымды түрде айқындаған Ахмет Байтұрсынұлы. Бұл бүгінге дейінгі әртүрлі бағытта нақтылай айтылып, келе жатқан сан алуан пікірлердің тірегі, алғашқы түйіні, ақиқат түйірі деуге лайық. Өйткені әлдеқалай айтыла салмай, әбден барлап, ойлап, тереңіне бойлап, мәнісін жете аңғарып айтылған түйінді ой тұжырымы.

Абай есімі-қазақ халқының ұлттық санасының оянуы мен рухани қайта жаңғыруының, қоғамның озық күштерінің өркениеттілікке ұмтылысы мен әлеуметтік әділдіктің символы. Ғасырлар бойытұрмыс салты үлкен өзгеріске түсіп жатқан аумалы-төкпелі заманда, қоғам көшінің ендігі бағытын айқындау, қалайда елдің елдігін, тұтастығын, халықтың ұлттық рухының тазалығын сақтай отырып, жаңа жағдайға бейімделу қажет болды.Нағыз халықтық, реалистік принциптерге негізделген жаңа жазба қазақ әдебиеті, Абай шығармалары осы қоғамдық сұранысқа толық жауап берді. Ақын шығармаларын оқи отырып, біз оның адам жаны мен уақыт талабын жете түсінген дарын иесі болғандығына көз жеткіземіз. Абай өзінің адамгершілік, қоғамдық, эстетикалық ізденістерін бүкіл дүние жүзі мәдениетінің жетістіктерімен ұластырып, өзі де жаңа биік деңгейге көтеріле түсті. Сол арқылы бүкіл адамзаттық идеяларға жол тапты. Ол қазақ поэзиясының, халық даналығының барша жақсы тәжірибесін бойына сіңіре отырып, ұлттық поэзияны, өнерді, қоғамдық ойды байыта отырып, жаңа сапалық биікке алып шықты. Абайдың әдеби мұрасының дүниежүзілік мәні, оның өз шығармаларында туған халқының мүддесін, түпкі мақсат-мұратын айқын көрсете отырып, жалпы адамзаттық құндылықтарды жете бағалай білген. Ұлы ақынға тән суреткерлік дарындылығын, кемеңгер ойшылдығын анық көрсетті.

Алтынбекұлы Бақдәулет

Жамбыл облысы,

Талас ауданы

Қаратау қаласы

№1 мектеп-лицейдің қазақ тілі пәнінің мұғалімі