Шерхан Мұртаза шығармашылығының үлкен бір негізгі саласы халқымыздың өмірі мен бастан кешкен әрқилы оқиғаларын шынайы бейнелейтін тарихи романдары. Қазіргі қазақ әдебиетінде роман жанрының көшбасшылық рөлге ие екендігі ақиқат. Өйткені еліміз өмірінің кезеңдік оқиғаларын бейнелеуде салиқалы да салмақты өмір шындығын бағамдап көрсетудегі ең үлкен таразы осы жанр екендігі де шындық. Роман өмір-тіршілікті кең ауқымда алып, тереңнен қамтып көрсетеді, соған байланысты қаламгерден ізерлі ізденісті, суреткерге тән ұшқыр сезім-түйсікті, шынайы шеберлікті талап етеді.