Сенімділік-басты қару.

Жасөспірімдер - қоғамның ең белсенді әрі ойы жаңа қалыптасып келе жатқан буыны. Әр баланың өзіндік пікірі, көзқарасы болады. Бірақ, өкінішке қарай, көп жасөспірімдер өз ойын ашық жеткізуден қорқады. Бұл құбылыстың бірнеше себебі бар.

Ең алдымен, көптеген балалар қателесіп қалудан қатты қорқады. «Дұрыс айтпасам, достарым күледі», «сыныптастарым мазақ етеді» деген ой оларды тоқтатып қояды. Психологтардың айтуынша, жасөспірімдердің жартысынан көбі басқалардың ойынан қысылып, өз пікірін айтпайды.

Екінші себеп - үлкендердің көзқарасы. Кейде мұғалімдер мен ата-аналар баланың сөзін тыңдаудың орнына: «Сен әлі кішкентайсың», «бұл жайында ойланба» деп тыйып тастайды. Мұндай жағдай балаға сенімсіздік туғызып, ойын еркін айтуына кедергі болады.

Үшіншіден, жасөспірімдер үшін достарының пікірі өте маңызды. Егер ортада қолдау көрсетілмесе, олар үндемей қалғанды жөн көреді. Ал егер пікірін сыйлап тыңдайтын орта болса, бала сенімді болып өседі.

Деректерге жүгінсек, ЮНИСЕФ-тің зерттеуі бойынша Қазақстандағы жасөспірімдердің үштен бірі өз ойын ашық айтуға қорқатынын мойындаған. Әлемдік көрсеткіш те осыған ұқсас. Яғни, бұл - көптеген елде кездесетін мәселе.

Бұл жағдайды қалай өзгертуге болады? Ең алдымен, ата-аналар мен мұғалімдер балалардың ойына құрметпен қарауы керек. Қателесу - ұят емес, үйренудің бір жолы екенін түсіндіру маңызды. Сондай-ақ пікірталас, дебат, ашық әңгімелер ұйымдастыру балалардың батыл сөйлеуіне көмектеседі.

Қорытындылай келе, әр жасөспірімнің пікірі - болашаққа қосылған үлес. Біз оларды тыңдай білсек, еркін ойлайтын, сенімді де батыл ұрпақ өсіп шығады.

Жасөспірімнің дауысы - қоғамның ертеңгі үні!