Сыбайластық – қоғам дерті

Кез келген өркениетті қоғам үшін сыбайлас жемқорлықпен күрес ең өзекті мәселенің бірі болып табылады. Сыбайлас жемқорлық – заман ағымымен бірге өсіп-өркендеп, мол қаражат және қоғамдық бәсекелестік пайда болған жерлерге тамырын жайып, бүгінгі күнге дейін жойылмай отырған кеселдің бірі.

Әрбір азамат өзінің қызметін адал атқарып, туған елінің шынайы патриоты болғанда ғана қуатты мемлекет құрылады. Елге адал қызмет ететіндер де, керісінше, теріс қылық жасайтындар да бар. Содан болар, халық несібесі мен ел қазынасына қол салатындардан арылу барлық мемлекеттің өзекті мәселесіне айналып отыр. Бұл тұрғыда елімізде арнайы заңдар қабылданып, жүйелі бағдарламалар жүзеге асуда. Тіпті, сыбайлас жемқорлыққа қатысты іс-әрекеттің алдын алуға көмектескендерге үкімет тарапынан арнайы сыйақы да қарастырылған. Олардың қауіпсіздігі заңмен қамтамасыз етілген.

Ұжым мүшелерінің құқықтық сауаттылығын арттыру, сыбайлас жемқорлыққа төзбеушілікті қалыптастыру, теріс әсерін тигізетін сыбайластықты болдырмау мақсатында Қапшағай қаласындағы «Балдәурен» балабақшасында көптеген оң жұмыстар атқарылып келеді. «Сыбайлас жемқорлыққа қарсы іс-қимыл – әрбір азаматтың міндеті», «Қауіпті құбылыс», «Сыбайлас жемқорлықпен күрес – ортақ парызымыз», «Сыбайластық абырой әкелмейді» тақырыптарында құқықтық оқулар, дәрістер, дөңгелек үстелдер, әңгімелер, пікірсайыстар ұйымдастырылды. Сыбайлас жемқорлыққа қарсы мәдениетті қалыптастыру мақсатында өткен «Сыбайлас жемқорлық – әлеуметтік індет» атты пікірсайыста балабақша педагогтері өз ойларын ортаға салып, дәйекті пікірлерімен бөлісті. Сонымен қатар, шара кезінде жемқорлыққа қарсы арнайы түсірілген әсерлі бейнероликтер көрсетілді. «Сыбайлас жемқорлық» тақырыбында ZOOM платформасы арқылы онлайн кездесу өтті. Аталған онлайн кездесуге балабақша тәрбиеленушілердің ата-аналары қатысты. Кездесуде түсіндірме жұмыстары айтылды, баяндамалар оқылып, берілген сауалдарға жан-жақты жауаптар берілді.

Сыбайлас жемқорлықпен күресті жеке қарау мүмкін емес. Сондықтан кез келген ортада пара беру мен пара алудың жолын кесуде қоғам болып белсенділік танытуымыз қажет. Азаматтар пара беруді мәселе шешудің ең жеңіл, оңай жолы деп біледі. Ал, кез келген мәмелені заңды жолмен шешуге үйренсек, жемқорлық өзінен-өзі тыйылады.

Көп жағдайларға сыбайлас жемқорлыққа бару, қылмыс жасау қарапайым қағидаларды, заңды білмеушіліктен туындап жатады. Егер адам парақорлық пен жемқорлық үшін өзін қандай жаза, жауапкершілік күтіп тұрғанын білсе, ойланары сөзсіз. Азаматтарымыздың заңға деген құрметі артса, заң үстемдік құрады. Осы жағдайда ғана қоғамымызда жегіқұртқа айналған сыбайлас жемқорлықты жеңетініміз күмәнсіз.

Қалдыбекова Фарида Қалдыбекқызы

«Алматы облысы білім басқармасының

Қапшағай қаласы бойынша білім бөлімі»

мемлекеттік мекемесінің «Балдәурен»

балабақшасы» МКҚК,

дене шынықтыру нұсқаушысы