Сынып сағаты Адам болам десеңіз

Мерзімі: 22.10.2018ж.

Сабақтың тақырыбы: Бес нәрседен қашық бол!

Сабақтың мақсаты: Адамдарға жақсылық жасауға үйрету, оқушының

ой-өрісін, дүниетанымын дамыту, әдептілікке тәрбиелеу.

Сабақтың көрнекілігі: суреттер, нақыл сөздер

Сабақтың барысы:

І.Ұйымдастыру кезеңі

-Оқушылармен амандасу, түгендеу

Мұғалімнің сөзі: Абай Құнанбаев 1845 жылы 10 тамызда Семей облысы, Шыңғыстау ауданында туған. Абайдың ынта-талабын сезген әкесі Құнанбай оны 9 жасынан бастап Семей медресесіне оқуға береді. Медреседе Абай өз бетінше орыс тілін оқып үйрене бастайды. Бірақ ел билеу кезінде өзіне қолқанат – серік ету мақсатын көздеген Құнанбай оның ұзақ оқуына мүмкіндік бермей, 13 жасында оқудан шығарып әкетеді. Өзінің көптеген тұстастарының айтуына қарағанда, Абай 13 жасынан өлең шығарған. Абай қазақтың таза ұлт тілінде өлең жазумен ғана қанаттанып қойған жоқ. Ағартушы-ақын, жаңашыл композитор-бір басына осындай сирек дарын қонған.

Адам болам десеңіз

Ғылым таппай мақтанба,

Орын таппай баптанба,

Құмарланып шаттанба

Ойнап босқа күлуге.

Бес нәрседен қашық бол,

Бес нәрсеге асық бол,

Адам болам десеңіз.

Өсек, өтірік, мақтаншақ,

Еріншек, бекер мал шашпақ –

Бес дұшпаның білсеңіз.

Талап, еңбек, терең ой,

Қанағат, рақым ойлап қой –

Бес асыл іс көнсеңіз.

-Абайдың бізге айтқан қандай бес асыл ісі бар?

-Ал қандай бес дұшпанды айтып кетті?

-Бес асыл іс: талап, еңбек, терең ой, қанағат, рахым.

-Бес дұшпан: өсек, өтірік, мақтаншақ, еріншек, бекер мал шашпақ.

-Өте жақсы, балалар! Бес асыл іс пен бес дұшпанның ара жігін ажыраттық.

-Оқу, білім туралы мақал-мәтел білеміз бе?

1.Білімді мыңды жығады,

Білекті бірді жығады.

2.Оқыған озады,

Оқымаған тозады.

3.Оқусыз - білім жоқ

Білімсіз күнің жоқ.

4.Оқу – білім бұлағы,

Білім - өмір шырағы.

5.Ақыл азбайтын тон,

Білім таусылмайтын кен.

Сабақты қорытындылау

Абай атамыз айтқан екен:

Үш-ақ нәрсе адамның қасиеті: ыстық қайрат, нұрлы ақыл, жылы жүрек.

Ыстық қайрат – бұл еңбек, егер кім көп еңбек етсе,соның қайраты мол.

Нұрлы ақыл – сенің ақылынның нұрынан басқалар шуақ алу керек.

Жылы жүрек – бұл қайырымдылық.

Біз осы қасиеттерді бойымызға сіңіре білсек, жақсы адам боламыз.