Табиғатты аялау – ұлт болашағына қызмет

Қазіргі таңда экологиялық мәдениет – қоғам дамуының басты көрсеткіштерінің бірі. Табиғатты қорғау, оны сақтау мен қалпына келтіру ісі тек мемлекет пен ғалымдардың ғана емес, әрбір азаматтың, әсіресе жас ұрпақтың борышы. Осы орайда еліміздің мектептерінде құрылған «Жасыл клубтар» экологиялық қозғалысы – жастарды табиғатқа жанашырлықпен қарауға тәрбиелейтін маңызды бастама.

«Жасыл клубтың» негізгі мақсаты – оқушылардың табиғатқа деген сүйіспеншілігін арттыру, экологиялық мәдениетті қалыптастыру және қоршаған ортаны қорғауға деген белсенді көзқарас орнату. Клубтың жұмысы балалардың бойына экологиялық сана мен жауапкершілікті дарытып, туған жердің табиғи байлығын аялауға, оны қорғауға бағытталады. Бұл ұйым – тек ағаш отырғызу не сенбілік өткізу емес, бұл – экологиялық ойлау мен өмір салтын қалыптастыру алаңы.

Қазіргі таңда экологиялық сауаттылықтың төмендігі, ауа мен судың ластануы, тұрмыстық қалдықтардың көбеюі – адамзат алдында тұрған ең өзекті мәселелердің бірі. Мұндай жағдайда «Жасыл клуб» секілді бастамалар жастардың бойында табиғатты қорғауға деген нақты іс-әрекет дағдысын қалыптастыруға үлкен мүмкіндік береді. Мысалы, клуб мүшелері мектеп аумағын көгалдандыру, қалдықтарды сұрыптау, тұрмыста қайта өңдеу жобаларын іске асыру, экологиялық стартаптар ұйымдастыру сынды жұмыстармен айналысады. Мұның барлығы жас ұрпақтың әлеуметтік белсенділігін арттырып, олардың қоғамдағы рөлін айқындай түседі.

Сонымен қатар, «Жасыл клуб» экологиялық тәрбие берумен қатар, балалардың көшбасшылық, ұйымдастырушылық қабілеттерін дамытуға бағытталған. Оқушылар өз жобаларын қорғап, бастама көтеріп, заманауи экологиялық шешімдер ұсынуға мүмкіндік алады. Бұл – болашақта экология саласында еңбек ететін жаңа буын мамандардың қалыптасуына жол ашады.

Мектеп қабырғасынан бастап экологиялық мәдениетке баулу – ел ертеңіне жасалған инвестиция. Өйткені табиғатқа жанашыр ұрпақ – туған жерінің әр талын, әр бұлағын қастерлейтін, өз елінің болашағын ойлайтын ұрпақ. «Жасыл клуб» осы ұстанымды басты бағыт етіп, балаларды табиғатты сүюге, қорғауға және оны дамытуға шақырады. Мектебімізде «Жасыл клуб» еріктілер тобы 2024 жылдан бастап жұмыс атқарады. Оқушылармен бірге сынып жетекшілер және жаратылыстану пәндері мұғалімдері бастамашыл болып, еріктілер тобы жұмысын атқаруда. Еріктілер тобының көктем, күз мезгілінде мектеп ауласынан басқа ауылдың ішкі тазалығынада білек сыбана атсалысады. Тек тазалық жұмыстарымен ғана шектелмей ашық тәрбие сағаттары, іс-шаралар жүргізілді. «Жасыл клуб» еріктілер тобының жобалық жұмысы мектептің энергиясын үнемдеу үшін «Күннен Quat» жобасын жүргізеді. 10 – сынып жетекшісі Асылбеков Н. және 8-сынып жетекшісі Иланва А. экожобаларды «Үздік сынып жетекші – 2024» және «Жылдың үздік сынып жетекші – 2025» байқауларында таныстып жүлдегерлер қатарында анықталды.

Жаһандану дәуірінде экологиялық проблемалар күннен-күнге күрделеніп келеді. Сондықтан да жас ұрпақтың бойына табиғатты қорғау құндылығын сіңіру – ең өзекті міндет. Мұндай игі бастамалар арқылы еліміз экологиялық мәдениеті жоғары, табиғатпен үйлесімді өмір сүретін қоғамға айналары сөзсіз.

Табиғатты қорғау – парыз, оны аялау – абырой. Ал «Жасыл клубтың» мақсаты – осы асыл борышты жас ұрпақтың жүрегіне ұялатып, оларды ел мен жердің нағыз жанашыры етіп тәрбиелеу

Қожахметова Ә.Ж.

«Мектеп жанындағы шағын орталығы бар Қызыларық орта мектебі химия және биология пәні мұғалімі

Adi_600747@mail.ru