Тәрбие сағаты: "Менің Қазақстаным"

Тақырыбы: «Менің Қазақстаным».

Мақсаты:

Білімділік: Мемлекеттік рәміздерді қастерлеуге, оны жатқа білуге үйрету.

Дамытушылық: Оқушылардың белсенділігін, өз ойын ашық айта білуін, ой-өрістерін дамыту.

Түзетушілік: Дыбыстардың айтылу мәдениетін қалыптастыру, сөздегі дыбыстарды түзету.

Тәрбиелік: Отанын, елін, жерін сүюге, оны қорғай білуге, саналы болуға тәрбиелеу.

Көрнекілігі: Суреттер, сұрақтар жазылған қима қағаздар, Қазақстан картасы, сөзжұмбақ.

Меңгерілетін сөздер: Рәміздер, Әнұран, Ту, Елтаңба, қасиетті өлке.

Барысы:

1. Ұйымдастыру кезеңі.

Тәрбиеші:

• Балалар, амандасамыз.

• Балалар, бүгінгі ашық тәрбие сағатымыздың тақырыбын бірге оқимыз: «Менің Қазақстаным».

Тәрбиеші:

• Қазақстан 1991 жылы Тәуелсіз ел атанып, аяғынан тәй-тәй басқан Республикамыз бен оның халқы үшін ерекше жыл болды.

1991 жылы 1-ші желтоқсанда қазақ елі Нұрсұлтан Әбішұлы Назарбаевты Республикамыздың президенті етіп сайлады.

1991 жылы қазақ елінің жалауы желбіреді, Әнұраны, Елтаңбамыз қабылданды. Қазақстан жер көлемі бойынша, дүниежүзінде 9-шы орын алады. Қазақстан табиғаты көркем, қазба байлықтарға бай өлке.

Қасиетті өлкеде 17 миллион халық бар, оның ішінде 130-дан аса түрлі ұлт өкілдері тату-тәтті өмір сүруде.

1993 жылы Ұлттық валютамыз төл теңгеміз дүниеге келді.

Қазақстан Республикасында 14 облыс, 90-ға жуық қаласы бар. Мемлекеттік тіл – қазақ тілі.

1998 жылы Еліміздің ел ордасы Астана қаласы болып жарияланды.

Тәрбиеші:

• Балалар, Қазақстан Репсубликасының рәміздері жайлы қандай тақпақтар білесіңдер?

1-оқушы:

Айнымайды аспаннан,

Біздің тудың бояуы.

Оны халық қашанда,

Биікке іліп қояды.

2-оқушы:

Туымызға жас туған,

Бір қарамай өтпейді.

Сол көк тудың астында,

Көгереміз көктейміз.

3-оқушы:

Елтаңбасы елімнің,

Елдігімнің белгісі.

Елтаңбасы елімнің,

Елдің тыныш тірлігі.

4-оқушы:

Ақжайық, Алтай арасы,

Қазақтың шалқар даласы.

Еліме менің қарашы!

5-оқушы:

Жерінің дәні маржандай,

Қырманы асқар таулардай.

Жеріме менің қарашы!

6-оқушы:

Тамаша аспан менен жері қандай,

Зеңгір тау-дария менен көлі қандай!

Орман, тоғай, гүлденген бақшалары,

Пайдаланған бұлармен елі қандай!

7-оқушы:

Көз тіккен төрткүл дүние алты алашы,

Бұл бүгін қазағымның бас қаласы.

Елордам халқым үшін ерен бөлек –

Тәуелсіз еліміздің Астанасы.

8-оқушы:

Мен жас ұланмын,

Мемлекеттің қорғанымын ертеңгі.

Нұрға, гүлге толтырамын

Өзім туған өлкемді.

Тәрбиеші:

• Жарайсыңдар, балалар! Сендер Қазақстан Республикасы жайлы тамаша тақпақтар біледі екенсіңдер.

• Енді, Қазақстан Республикасы жайлы сұрақтарға жауап беріңдер.

1-сұрақ:

• Қазақстан Республикасы өз тәуелсіздігін қашан алды?

(Қазақстан Республикасы өз тәуелсіздігін 1991 жылы алды.)

2-сұрақ:

• Қазақстан Республикасының Президенті кім?

(ҚР-ның Президенті Нұрсұлтан Әбішұлы Назарбаев.)

3-сұрақ:

• Қазақ халқы өз президентін қашан сайлады?

(Қазақ халқы өз президентін 1991 жылы 1-ші желтоқсанда сайлады.)

4-сұрақ:

• Мемлекеттік тіл қай тіл?

(Мемлекеттік тіл – қазақ тілі.)

5-сұрақ:

• Мемлекеттік рәміздерді атаңдар.

(Елтаңба, Ту, Әнұран.)

6-сұрақ:

• Әнұранның авторлары кім?

(Жұмекен Нәжімеденов, Нұрсұлтан Назарбаев, Шәмші Қалдаяқов.)

7-сұрақ:

• Қазақстан Республикасында қанша облыс бар?

(Қазақстан Республикасында 14 облыс бар.)

Тәрбиеші:

• Қане, облыстарды бірге атаймыз.

• Облыстарды картадан көрсетеміз.

Тәрбиеші:

• Жарайсыңдар, балалар!

• Енді, ойын ойнаймыз. Шартын бірге оқимыз.

Ойынның шарты: Әріптердің орнын ауыстыру арқылы, жасырылған қала аттарын табыңдар.

МАТЫАЛ, АНАТСА, ОЛРА, ЕКТНМЫШ, НЕСӨМЕК, ҚАУТА.

Суреттермен жұмыс.

Тәрбиеші:

• Балалар, енді өздерің салған суреттерің жайлы әңгімелеп беріңдер.

(Балалар өздері салған суреттер жайлы әңгімелеп береді.)

Сөзжұмбақ.

Тәрбиеші:

• Ал, қане балалар, білімдеріңді сынап, «Қазақстан» сөзжұмбағын шешейік.

Сөзжұмбақ сұрақтары:

1. Көмір шығаратын қала.

2. Еліміздің Елордасы.

3. Қазақстандағы көл.

4. 5 · 4 =

5. Тұңғыш қазақ ғарышкері.

6. Уақыт өлшемі.

7. Алтын астық облысы.

8. Жұқа төсеніш.

9. Нұрсұлтан Әбішұлы Назарбаевтың анасының аты.

Тәрбиеші:

• Ұлық Ерсұлтанның орындауында «Жаса Қазақстан» әнін қабыл алыңыздар.

Қорытынды:

Тәрбиеші:

• Балалар, бүгінгі «Менің Қазақстаным» атты ашық тәрбие сағатымыз осымен аяқталды. Өз елін, жерін сүйетін ұлтжанды, мәдениетті, парасатты азамат болып өсулеріңе шын жүректен тілектеспін.

• Бүгін сендер жақсы сөйлеп, жақсы жауап бердіңдер.

• Қонақтармен қоштасамыз.

• Сау болыңыздар.