Тәуелсіздік күніне толғау

Тәуелсіздік күніне толғау

Жігерді,мейлі,құм қылып

Жасытқын мені

Ем таба алмай жан жарасына

Тоқтаусыз төпеп тұрса да уақыттың желі.

Риза боп мәңгі өтер ем,шіркін

Жалғанда мына

Мұң толы қасіреттің де ішінен

Сезілер болса жылт етіп бақыттың лебі.

Азаттық үшін

Шежіре жібін тарқатып бір сәт,

Ширатып шығам шыр айналдырып азаптың ұшын.

Ғажап күн үшін

Шақшадай басым шара боп, шыдам бітсе де

Шарқ ұрып тіпті, шарлап шығар ем тозақтың ішін!

Алты да қарыс азуын айға да білеп,

Ерліктің туы көк аспанымда құлаш ұрды да

Құшаққа қысып, аймалады кеп.

Бостандық үшін барымды берем, тілерім жалғыз —

Тастасын елді бодандық дейтін құрсаудан алып

Басқасын енді ойлама, жүрек!

Егемендігім—

Биік боп мәңгі,

Тең болып тұрса өзге жұртпенен терезең бүгін,

Арманың бар ма өмірде басқа?

Тәуелсіз елдің рухына тәу етші одан да

Танытып нағыз қайсар халықтың көрегендігін!

Төтеп бергенде асау өткелдің ағысына да,

Таусылмай демі, төзе де білді

Тағдырдың талай сүрлеуінде өткен шабысына да.

Ызғарын шашып, жел соқса бірге естілетіндей

Еміс те еміс бабаларымның қан кешкен дауысы ғана.

Қарыпбаева Бағжан Айдарқызы