Тәуелсіздік – Мәңгілік елдің тұғыры

Тәуелсіздік! Бұл сөзді естігенде жанымыз жадырап сала береді. Өйткені, осы Тәуелсіздік ата-бабаларымыздың ғасырлар бойы аңсаған арман мұраты. Тәуелсіздікке жету жолында Қазақстан атты байтақ еліміз көп тер төкті. Ұлт мүддесін көздеген ата-бабаларымыздың рухынан бастап, елім, жерім деп от жүрегі лапылдап жанатын бүгінгі жас ұрпақтың түсініп жүргені қуантады. Қазақ, ертеден-ақ бірлігі жарасып, біртұтастықты сақтай білген ұлт. Сондықтан қазақ халқында «Бірлік болмай, тірлік болмас» мақалы бекер айтылмаса керек.

Тәуелсіздік – еліміздің ең басты мерекесі. Қазақстанның жаңа дәуірде қол жеткізген барлық табысының қайнар көзі – Тәуелсіздік. Тәуелсіз ел болғандығымыздың арқасында ғана Қазақстанның сөзі мен ісін бүкіл әлем таныды. Дүниенің бір бұрышында қазақ деген халықтың үлкен істер тындыра алатын өресі мықты, өрісі кең халық екенін әлем білді

Сәби болып шыр етіп дүние есігін ашқан сәттен ана сүтімен дарыған осынау ұлы тіліміздің рухы біздің басты байлығымыз. Тіл –береке мен бірлігінің тұтастығы. Ал тәуелсіздік сол береке мен бірліктің тірегіш бөлшегі іспетті. Біз Тәуелсіз ел бола отырып көптеген ұлы қадамдар жасай алдық және де келешекте әлем елестетпеген асулардан асарымыз сөзсіз. Сол асуларды бағындырушы күштің бүгінгі тірегі, ол – Тәуелсіздік. Тәуелсіз бола отырып біз тіл еркіндігін, дін еркіндігін, адами қарым-қатынас тепе-теңдігін сақтай білген елміз. Осы істеріміздің барлығы мақтауға, мақтануға тұрарлық.

Ертеден дана халық арман еткен мәңгілік ел тұғыры бүгінгі күннің орындалуы қажет басты құндылықтардың бірі. Бүгінде біз Тәуелсіздік пен Мәңгілік Ел тұжырымдарын бірге атап айтқанды жөн көреміз.Айтылған тұжырым бір-бірімен тығыз байланысты, себебі, Тәуелсіз ел бола жүріп Мәңгілік Елдік рухымызды тани алмасақ, еш нәрсені де тани алмағанымыз.

Қазақстан десе әрбір баланың, ересектің, қарттың ойына өзі тұрып жатқан елі, кіндік қаны тамған жері бірден ойымызда сайрап тұрады. Қазақстан бүгінде көп жетістікке жетіп, жаңа қадамдарды бағындыра алған алпауыт мемлекеттердің бірі. Әрине, жеткен жетістігіміз көп: ел астанасын ауыстыру, БҰҰ құрамына кіру, ядролық қаруды қолданудан бас тарту, әлемдік спорттық олимпиадаларға қатысып, жүлдегер атану, ЕХРО – 2017 халықаралық көрмесін өткізу мүмкіндігіне ие болу. Осының бәрі Қазақстан деген Тәуелсіз елдің айбынды да абыройлы жеңісі. Барлық жетістікті, еңсерген биіктерді айтуға сөз, жазуға сия жетпесі анық.

Тәуелсіздік арқылы бүгінгі ұрпақтың болашаққа деген қадамдары нық, әрі бекем болып отыр. Егеменді ел бола отырып Қазақстан өз экономикасын, сауда-саттығын дамытуға көп көңіл бөлуде. Халық тұрмысының жақсаруы, еліміздің қарыштап дамуы, барлық істі жұмыла атқаруымыз бірлік пен береке негізі екенін көрсетеді. Бірлік пен берекені сақтау арқылы біз ең біріншіден көрші елдермен қарым-қатынас сақтауды, жүрегі елім деп соққан патриоттарды тәрбиелеуге бар күш-жігерімізді жұмылдырамыз. Әлем сахнасында Қазақстан деген ел барын, қазақ деген ұлт барын таныту үшін барлығымыз бір адамдай бір женнен қол, бір жағадан бас шығарып, барлық істі келісе отырып, бір ойдан шығатындай етіп талдап отыруымыз қажет. Сонда ғана «Қазақтықтың төріне, азаттықтың беліне» шығарымыз анық.

Бейбіт күннің шуақты нұрын сезіне білген кешегі ата-баба, бүгінгі жас ұрпақ «Қазақ» елінің ұстанып отырған салиқалы саясатына дән риза болары анық.Елбасымыздың ұстанған саясаты қазақ жерінің біртұтас мүддеге бағытталған ел ғана емес, барлық асуды бағындыруға бар ынта-жігерін жұмсайтынын көрсетеді.

Ата Заңымызда анықталғандай, Елбасы мәртебесі мен міндеттерінің бір парасы жыл сайын халыққа арналған Жолдауын жариялау болып табылады. Алғаш рет осынау конституциялық міндетін Тұңғыш Президент Н.Ә. Назарбаев 1997 жылы атқарған еді. Содан бері жылдың басты оқиғалары қатарына кіргеніне қоса, Жолдау әрбір қазақстандық асыға күтетін құбылысқа айналды. Оның басты себептері мынаған саяды: біріншіден, құжат еңбектеген баладан еңкейген қартқа дейін назардан тыс қалдырмайды. Балабақша, білім беру, денсаулық сақтау, зейнетақы, жәрдемақы мәселелерін ешбір Жолдау айналып өткен емес.      Екіншіден, азаматтардың ірілі-ұсақты тіршілік түйткілдерін шешкен Жолдауларда ұлы міндет – тәуелсіздікті бекемдеу, мемлекеттілікті қалыптастыру, елішілік ынтымақ пен келісімді сақтау көзделді, нақты тетіктері дәйектелді, діттеген межелер нақтыланды. Құрғақ уәдеге, даңғазалыққа, дарақылыққа орын берілмей, халықтың сенімі мен қолдауына ие болды. Үшіншіден, Жолдаулар Қазақстанның әлемдік қауымдастыққа кірігуіне, бәсеке мен сын-қатерлерден бойды аулақ салмай, төтеп беруге, аман-есен өтуіне, халықаралық қатынастардың танымал да белсенді субъектісіне айналуына қызмет еткенін ерекше атап өтуіміз керек.

Еліміздің болашағы жастардың қолында! Саналы ұрпақ тәрбиелеп, Тәуелсіз Қазақстанды әлемге таныту біздің парызымыз. «Еліміздің келешегі жастардың қолыңда» деген сөз біздерге үлкен жауапкершілік жүктейді. Ел ертеңі даналық сөзді жадымызда сақтап, көрсеткен бағыт-бағдарымен, сара жолымен ілгері басып келеміз. Бүгінгі күні талапты да, тапқыр, талғампаз да, терең ойлы, төзімді де, табанды болып өсуіміз туған еліміздің жарқын келбеті деп түсінеміз.