Текелі — тек кеншілер қаласы емес, Жетісудың Швейцариясы

«


Текелі – таудың етегі, үш өзеннің мекені». Бұл жай ғана ұйқас емес, табиғаттың өзі салған сурет. Кезінде одаққа танымал кен өндірісінің орталығы болған қала бүгінде жаңа тыныспен өмір сүруде. Бірақ біз Текеліні тек өндіріс көзі деп қана танудан арылуымыз керек. Бүгінгі Текелі — бұл Жетісудың Швейцариясы, эко-туризмнің болашақ астанасы.

Текелінің ең басты байлығы — оның географиялық орналасуы. Қора, Шажа және Текелі өзендерінің тоғысқан жерінен бастау алатын таулы аймақ кез келген шетелдік курортпен бәсекелесе алады. Орталық Азиядағы ең биік сарқырамалардың бірі — Бурхан-Бұлаққа барар жол осы қала арқылы өтеді. Бұл сарқырама — тек табиғат ғажайыбы емес, қаламыздың әлемдік деңгейдегі бренді бола алатын нысан.

Қаламыздың туристік тартымдылығын арттыру үшін тек сұлулықты айтып қоймай, нақты туристік бағыттарды (маршруттарды) қалыптастыру қажет. Текеліде мынадай тур түрлерін қолға алуға болады:

«Сарқырамалар сыры» (Экспедициялық тур): Бурхан-Бұлаққа жол талғамайтын көліктермен (off-road) арнайы саяхаттар ұйымдастыру.

«Тарихқа саяхат» (Танымдық тур): Көне Текелі стеласынан бастап, қаланың іргетасы қаланған алғашқы кен орындары мен зауыт тарихын қамтитын экскурсиялар.

«Жетісу Швейцариясы» (Фото-тур): Қаланың ең биік панорамалық нүктелеріне блогерлер мен фотографтар үшін арнайы жаяу жорықтар (hiking).

Жергілікті гидтер мектебін ашып, қала тарихын жақсы білетін белсенді жастарды осы іске тарту керек. Бұл жастар үшін қосымша жұмыс көзі әрі туған жерін танудың жаңа сатысы болар еді.

Кедергілер: Не кедергі болып отыр? Алайда, «Швейцарияға» айналу жолында шешімін таппаған түйткілдер де аз емес. Ең басты кедергі — инфрақұрылым мен жол сапасы. Сонымен қатар, экологиялық мәдениет мәселесі де өткір тұр. Туристер ағыны көбейген сайын, табиғаттың ластану қаупі де артады. Біз туризмді дамыту арқылы табиғатты құртып алмай, оны қорғауды қатар үйренуіміз қажет.

Текелі — тарих пен табиғаттың үндескен мекені. Кеншілер қаласынан туристік орталыққа айналу — уақыт талабы. Егер біз жергілікті патриотизмді сөзбен емес, іспен көрсетіп, табиғатымызды қастерлей білсек, Текелі расымен де Жетісудың мақтанышына айналатыны хақ.

"Journivers " Білім беру орталығының оқушысы:Ақмарал Бекейқызы