«Тілге құрмет - елге құрмет» мақала

«Тілге құрмет - елге құрмет»

Туған елім – тірлігімнің айғағы,

Тілім барда айтылар сыр ойдағы,
Өссе тілім менде бірге өсемін,
Өшсе тілім мен де бірге өшемін! – деп, ақын Әбділда Тәжібаев ағамыз жырлағандай тіл қай елде болса да қастерлі, құдіретті. Ол достықтың кілті, ынтымақтастықтың бастауы, ырыс – берекенің алды, ұлттың әрі жаны, әрі ары. Тіл жай сөз емес, өмірдің талай сынынан өткен, өскелең талаптарға сәйкес өрістей түскен толыққанды ақиқат десек, жаңыла қоймаспыз.
Тіл ‑ халықтың даналығы, танымы мен талғамын тауып айтатын шыншылдығын көрсететін, ғасырдан ‑ ғасырға, ұрпақтан-ұрпаққа мирас болып келе жатқан баға жетпес қазынасы. Тілде ақиқатты танып білудің сан ғасырлық бай тәжірибесі жинақталған.Тіл-қай ұлтта, қай елде болсада қастерлі,құдіретті! Ол әрбір адам болып туылған жанға ана сүтімен бірге еніп, қалыптасады.Тіл байлығы-әрбір елдің ұлттық мақтанышы.

Ұлттың мәдениетінің гүлденуі мен адамдардың тарихи қалыптасқан тұрақты қауымдастығы ретінде ұлттың өзінің болашағы ана тілдің дамуына, оның қоғамдық қызметінің кеңеюімен тығыз байланысты. Сондықтан туған тілге деген сүйіспеншілік бала кезеңнен басталуы тиіс. Айналаңды танып білу, туған тіліңді білуден басталады.

Туған тілдің абыройын асқақтату – әрбір азаматтың абзал борышы. Тіл – таусылмайтын байлық. Қанша тіл білсен, өзгеден сонша кез биіксің. Дегенмен, алдымен туған елінңің мемлекеттік тілін білуге міндеттісің. Тіл — халықпен бірге өмір сүріп дамиды, әр ұлттың тілі – оның бақыты мен тірегі.
Жыл өткен сайын ана тіліміздің мәртебесі өсіп, абыройы арта түсуде. Өз тілімізге алдымен өзіміз ие болуымыз қажет. Тілге деген құрмет алдымен әрқайсымыздың жүрегіміздің төрінен орын алуы керек. Ұлттық намыс, ұлттық рух әрқайсымыздың жүрегімізде ұйяламай іс бітпейді.
Егер Қазақстан Республикасының әрбір азаматы өзінің ана тіліне деген сүйіспеншілігін оятып, мемлекеттік тілдің одан әрі дамып нығайуына жауаптылықпен қарап, атап айтқанда мемлекеттік тілді басқа ұлт өкілдеріне үйретіп, мемлекеттік тілді насихаттайтын мақалаларды жиі жазып отырса, мемлекеттік тілдің келешегі нұрланып көркейе түсер еді.

Гүлнәр Досумова,

қазақ тілі мен әдебиеті пәнінің мұғалімі,

Қостанай қаласы.