Тренинг

Сіз, өз ортаңызда қандайсыз?

Мақсаты: Педагогтардың ұжымда қарым – қатынас іскерлігін өзара байланыс негізінде дамыту, көңіл – күйлерін көтеру.

Міндеттері: Тәрбиешілер арасында бір – біріне жағымды жағдай орнату. Адамдарды тыңдай білуге және өз ойын бөлісе білуге тәрбиелеу, өзіне деген сенімділігін дамыту.

Жоспары:

1. Танысу: «Менің саған айтқым келеді...»

2. Тест: «Өз – араңызда қандайсыз?»

3. «Мимикалық ситуация»

4. Сергіту сәті: «Өтінемін»

5. Жаттығу «Мен ойлаймын»

6. Коллаж: «Менің таңбам»

7. Қорытынды: «Бос микрофон» - тренингтен алған әсерлерімен бөліседі.

Кіріспе

Қарым – қатынас дегеніміз, адамдар арасында біріккен іс – әрекет қажеттілігін туғызатын күрделі процесс. Адамдар бір – бірінен санасы мен ақылы арқылы ерекшеленеді. Қарым – қатынассыз жеке адамды түсіну, дамуы мен жетілуін, мінез – құлқын, ерекшеліктерін білу мүмкін емес.

Танысу: «Менің саған айтқым келеді...» жаттығуы. Қатысушылар шеңбер бойымен тұрып осы фразаны өз қалаулары бойынша жалғастырып, бір – біріне ойларын жеткізеді.

Тест: «Өз – араңызда қандайсыз?». Қатысушыларға жеке – жеке тест сұрақтары беріледі. Әрқайсысы өздеріне тән нұсқаларын белгілейді. Соңында қорытындысын шығарып айтады.

Ойын: «Мимикалық ситуация». Қатысушылар ортаға шығып ситуация тақырыптарын таңдайды. Олар: «махаббат», «қызғанушылық», «достық», «көреалмаушылық» т.б. әр қатысушы өз тақырыбына байланысты мимика, панто – мимика арқылы ситуация құрайды. Қалған қатысушылар қандай ситуация құрылғанын табады.

Сергіту сәті: «Бір - біріңе» және «Өтінемін» жаттығуы.

Нұсқау: Сіздер осы жерде еркін жүріп, менің айтқан тапсырмамды орындауларыңыз қажет. Мен «бір - біріңе» дегенде сіздер жұптарыңызды табуларыңыз керек. жұптасқаннан кейін тапсырма беремін.

Сонымен бастадық: «бір - біріңе» енді бір – біріңіздің қолдарыңызды қысыңыздар, аяқтарыңызды – аяққа, басты – басқа, құлақты – құлаққа, беттеріңізді – беттерге, тигізіңіздер. Залда қайта еркін жүріңіздер, жаңа жұп табыңыздар. Ойын ары қарай жалғасады. «Өтінемін» деген сөзді айтсам сіздер оны орындауларыңыз қажет. Ал, «Өтінемін» деген сөзді айтпасам, сіздер ол өтінішті орындамайсыздар.

• Секіріңіздер

• Оң аяқтарыңызды көтеріңіздер

• Өтінемін, бір – біріңді құшақтаңыздар

• Оң қолдарыңызбен сол құлақтарыңызды уқалаңыздар

• Өтінемін, отырып, тұрыңыздар

• Өтінемін, шалқаямыз, еңкиеміз

• Оң қолымызды көтереміз

• Өтінемін, алақанмен шапалақ ұрамыз

Жаттығу: «мен ойлаймын...»

Біз бір – бірімізді жақын тану үшін әрқайсыларыңызға сұрақтар ұсынамын. Әр қатысушы сұрақтарды өз ойларымен аяқтайды.

Карточкадағы сөйлемдер:

Ең үлкен қорқыныш – бұл...

Мен мынадай адамдарға сенбеймін...

Мен ренжимін, егер...

Мен ұмытпаймын, егер...

Маған көңілсіз, егер...

Егер маған дауыс көтерсе, мен...

Мен қарсыласқанда...

Егер мен сенімсіз болсам, онда... т.б.

Коллаж: «Менің таңбам». Сіздер ең алдымен нені істей аласыздар, соны бейнелеу керек. екіншіден – өздеріңізді жақсы сезінетін орта (отбасы, балабақша, достарыңның ортасы, т.б.). үшіншіден – ең үлкен жетістігім. Төртіншіден – сенімді үш адам. Осының бәрін кестеге сөз, сурет, символ арқылы көрсетіңіздер. Бесіншіден – өзің туралы естігің келетін үш сөз.

Қорытынды: «Бос микрофон» - қатысушылар тренингтен алған әсерлерімен бөліседі.