Туған тілде әнім менен сәнім бар

Қарағанды қаласы

№34 ЖББОМ, 7 «Г» сынып оқушысы

Кригер Денис

Шығарма «Туған тілде әнім менен сәнім бар...»

Қазақстан менің – Отаным. Менің ғана Отаным емес, Қазақстан керемет ойшылдардың, дана адамдардың, философтардың, сазгерлердің, ақын мен жазушылардың мекен жайы. Бұл адамдардың еңбектері қазақ халқының тарихына, мәдениетіне, салт-дәстүрлеріне, санасына мәңгілікке енген.

Қазақ тілі – мемлекеттік тіл. Ұлттық тіл – ол тек сөйлеу мен ойын білдіру емес, бұл тілдің тереңінде қазақ халқының жаны,тарихы,салт-дәстүрлерін көреміз. Ана тілі дегеніміз – сол тілді жасаған, жасап келе жатқан халықтың бүгінгісі,өткені, болашағы. Қазақ тілінде орындалған ән мен күйлер қандай керемет! Күйдің ырғағына қарай түрлі сезімдерге бөленуге болады. Бірде қазақ даласында шауып келе жатсаң, бірде мұңға да берілесің.Көз алдыңа табиғат оның құбылыстары елестейді.Күймен қоса жел де, жаңбыр да болса, кейде бір тыныштыққа да ұласады.

Осы сезімдерді қазақ халқының ұлттық аспабы домбыра арқылы көріп, естіп сезіне аламын.

Бірақ, бәрінен қазақ тілінде мен үшін әнұран ерекше орындалады.

Білмеймін, осындай ерекше сезімге бөлеген әннің сөзі ме , халықтың жаны ма , тілеген тілектері ме?

Сонымен қоса қазақ халқы әнді де, өлеңді де жақсы орындайды. Ерекше әсер беретін қазақ халқының ертегілері мен бесік жыры.

Бесік жырында түрлі өлеңдер орындалады. Олар көбінесе төрт түлікке байланысты. Осы әуендер,ертегілер арқылы кішкентай балалар, елдің болашағы тәрбиеленіп өседі.Кішкентай кезінен бесік жырын естіген бала, менің ойымша ,ол әуенді, музыканы жақсы көретін бала болып өседі.Сөзге шешен, тауып, дәл айтатын болады.

Қазақ тілі қиын тіл. Тілдің сөздік қоры өте бай, мықты тіл. Тіл, сөз арқылы сезімді, іс-әрекетті, түстерді,көңіл-күйімізді айтуға, жеткізуге болады.

Әлемде болып жатқан барлық әрекеттер тіл арқылы орындалады, тілсіз мәдениет, ғылым, өнер салалары дамымас еді.

Әлемде, менің ойымша, құрметке бөленбеген тіл жоқ. Әр елдің тілі – керемет. Осы тіл арқылы адамдар бір –бірімен қарым-қатынасқа түседі.Тіл арқылы рухани баийды, әр халықтың салт-дәстүрлерімен танысады.Тіл – адамдарды бір-бірімен табыстырады, таныстырады. Бір-бірімен жұмыс істеуге, білімдерімен алмасуға, түсінісуге көмектеседі.

Менің ойымша, тіл – адамның басты байлығы.

Қазақстанда түрлі ұлт өкілдері тұрады.Ұлттар арасында татулық пен бірлік, ынтымақтастық пен достық орнағаны – бәріміз үшін мақтаныш. Қай тілде сөйлемейік, ол маңызды емес.Біз біздің елде тұрып жатқан басқа ұлт өкілдерімен татулықта, сыйластықта өмір сүруіміз керек. Президентіміздің тарапынан жасалып жатқан іс-шаралары, ішкі-сыртқы келіссөздерінің түпкі мақсаты көп ұлтты мемлекетіміздің тұтастығын,ынтымақтастығын сақтау. Елімізде тату-тәтті өмір сүру үшін мерекелік ән шашулар, театрландырылған қойылымдар, кино түсірілімдер және де басқа көптеген іс-шаралар жиі өтеді. Көптеген басқа ұлт өкілдері елімізге толық сіңіп кетті, олар қазақ жұртының тілін, дінін, салт-дәстүрлерін үйреніп алған. Мереке кездеріңде, қазақтың ұлттық киімдерін киеді, домбырамен ән салады.

Қорыта келгенде , бастысы тіліміздің тазалығын, байлығын сақтау керек деп ойлаймын.

Сонда туған елімнің әні де, сәні де болады.Осы тілде түрлі әндер, өлеңдер, әуендер, күйлер шырқала берсін!