ҰЛТ ҰСТАЗДАРЫ ҮНДЕСТІГІ

Тәжиева Гүлім, Қостанай облысы әкімдігі білім басқармасының Жангелдин ауданы білім бөлімінің «Ыбырай Алтынсарин атындағы жалпы білім беретін мектебі» КММ-сінің 9-сынып оқушысы

Бүгін мен қазақтың екі ұлы ұстазы – Ыбырай Алтынсарин мен Ахмет Байтұрсынұлы туралы әңгіме қозғаймын. Бұл екі тұлға – тек өткеннің кейіпкерлері ғана емес, бүгінгі күннің де ұлы мұғалімдері, ұлттың рухани жаңғыруының бастауы.

Ыбырай Алтынсарин 1864 жылы қазақ даласында алғашқы мектеп ашқан кезде, ол тек білім беруді ғана мақсат етпеді. Ол халықтың санасын ояту, рухани көтерілуі мен ұлттық тәрбие беру жолында еңбек етті. Оның жазған өлеңдері, оқулықтары – балаларға ғана емес, бүкіл ұлтқа үлгі.

Ахмет Байтұрсынұлы болса қазақ тіл білімінің негізін қалаушы ғалым ретінде тарихта қалды. Оның еңбектері қазақ тілінің тазалығы мен көркемдігін сақтауға арналған. «Қазақ» газетін шығарып, ұлттық идеяны халыққа жеткізді. Ахметтің әрбір сөзі – ұлттың жан-дүниесіне үңілуге шақыру.

Осы екі ұлы ұстаздың ұстанған ұстанымы бір – халыққа қызмет ету, ұлттың болашағын ойлау, ұстаздық пен азаматтықты үндестіру. Олар бізге ұлттық сана мен тәрбиенің түп қазығын қалдырды. Мен өзім оқитын мектеп – сол 1864 жылы Ыбырай Алтынсарин ашқан мектеп екенін мақтан тұтамын. Және осы жерде Ахмет Байтұрсынұлы да білім алғаны белгілі. Мен осы екі ұстаздың үндестігі жайлы жоба жазудамын. Бұл жұмыс арқылы мен өлкетану саласына өз үлесімді қосқым келеді. Себебі ұлт ұстаздарының мұрасын білу – өз тамырымызды тану, ұлттық болмысымызды сақтап, дамыту деген сөз.

Ыбырай мен Ахметтің мұрасы – біздің рухани байлығымыз. Олар білім мен тәрбиенің маңызын, ұлттың тілін, мәдениетін қорғаудың қажеттілігін бүгінгі ұрпаққа жеткізді. Бүгінгі мектептер мен ұстаздар осы мұраны жалғастыруы тиіс. Ұлт ұстаздарының үнін естіп, рухани жаңғыруға бірге атсалысайық!