Математика – жай ғана есеп шығару емес. Көпшілігіміз математиканы тек сандар мен формулалар деп ойлаймыз. Алайда шын мәнінде математика – біздің күнделікті өміріміздің ажырамас бір бөлігі. Уақытымызды дұрыс пайдалану, жоспар құру, істерімізді рет-ретімен орындау – осының бәрі математикалық ойлаудың нәтижесі.

Кейде айналамызда барлық нәрсеге үлгеретін адамдарды көреміз. Олар мектептегі сабақтарына да қатысады, қосымша сабақтарына да барады, спортпен де айналысады, тіпті өзіне демалуға да уақыт табады. Ал біз кейде бір-екі істі қатар алып жүрудің өзі қиын деп ойлаймыз. Неге олай? Оның себебі – дұрыс жоспар құруда және уақытты есептей білуде.

Математиканы жақсы меңгерген адам тек есеп шығарып қана қоймайды, ол өз уақытын да тиімді ұйымдастыра алады. Мысалы, бір оқушы күнделікті жоспарын алдын ала құрып қояды делік. Ол мектептен кейін қай уақытта қосымша сабағына баратынын, қай кезде үй тапсырмасын орындайтынын, ал қай уақытта демалатынын нақты белгілеп алады. Осылайша ол әр минутын есептеп, уақытын босқа өткізбейді.

Жоспар құру – бұл да бір есеп шығару сияқты. Себебі біз әр істі белгілі бір уақытқа бөліп, оны дұрыс орналастыруымыз керек. Егер біз күнделікті атқаратын істерімізді алдын ала ойластырып, нақты жоспармен жүретін болсақ, онда бәріне үлгеруге толық мүмкіндік бар. Бұл жерде математика бізге ойлауды, салыстыруды, тиімді шешім қабылдауды үйретеді.

Мысалы, бір күнде 24 сағат бар. Оның белгілі бір бөлігін ұйқыға, бір бөлігін сабаққа, ал қалғанын басқа істерге бөлеміз. Егер осы уақытты дұрыс есептемесек, бір іске көп уақыт жұмсап, екіншісіне үлгермей қалуымыз мүмкін. Ал егер бәрін алдын ала жоспарласақ, уақытымызды үнемдеп, өзімізге де, оқуымызға да жеткілікті көңіл бөле аламыз.

Сондықтан әрқайсымыз уақытты бағалай білуді үйренуіміз керек. Уақытымызды үнемдеу – табысқа жетудің алғашқы қадамы. Ал бұл жолда бізге көмектесетін ең маңызды құралдардың бірі – математика. Демек, математиканы жақсы меңгеру тек сабақта ғана емес, өмірде де үлкен пайдасын тигізеді.