Мұғалім әлемдегі ең үздік мамандық (Эссе)

1 слайд
Мұғалім әлемдегі ең үздік мамандық (Эссе) Ақырын жүріп анық бас Еңбегің кетпес далаға Ұстаздық еткен жалықпас Үйретуден балаға – деп, ұлы Абай атамыз айтқандай, шәкірт тәрбиелеу жолында адал еңбегімен, әр шәкірттің жүрегінен жол тауып, білім нәрімен сусындатып, үлкен өмірге аяқ бастырып, олардың жетістігіне қуана білген мұғалім еңбегінің орасан зор екені бәріне ақиқат. Болашақтың тізгінін ұстайтын, жас ұрпаққа саналы білім мен тәрбие беру ісінде өзіндік орны бар ерекше мамандық иесі бұл – мұғалім. Еңбектеген баладан еңкейген қарияға дейін құрметтейтін, үлгі тұтатын мұғалім мамандығы әлемде ең жоғарғы, сыйлы мамандықтардың қатарында. Мұғалім болу кез келгеннің қолынан келетін оңай іс емес. Оған жан-жақты дайындығы мол психологиялық тұрғыдан өзін-өзі ұстай алатын, сабылы да салмақты адамдар ғана педагог мамандығын меңгеріп оқушылармен жұмыстана алады. Телефонға термілген баламен жұмыстану қазіргі кезеңде оңайға соқпайтыны анық. Дегенмен осындай қиындықтарды жеңіп қайткен күнде де баланы бір өмірдегі өзіндік кірпіш болып қалануына еңбек сіңіретін мұғалімнің еңбегі ерекше деп білемін. Сондықтан менде осы мұғалімдер қатарынан табылғаныма қуаныштымын. Менің мамандығым – мұғалім. Қиындығы мен қызығы мол осы мамандықты бала күнімнен армандадым. 2009 жылы Махамбет ауылының Махамбет ЖОББ мектебіне математика пәні мұғалімі болып жұмысқа орналастым. Ең алғаш «Мұғалім» деген атаққа ие болуым да осы мектептен басталды. Бұл мектеп оқушылары менің армандарымның жүзеге асуына өз үлестерін қосты. «Бала жүрегі – кішкентай күй сандық. Сол сандықтың кілтін тапсаң ғана ашылады. Мұғалімнің қолында әр кезде сол кілт тұру керек» - деп Мұхтар Шаханов ағамыз айтқандай, әр балаға дұрыс тәрбие бере отырып, сапалы білім беру әр мұғалімнің негізгі міндеті деп санаймын. Мектептің жүрегі – мұғалім болса, мүғалімнің жүрегі - шәкірттері. Олар бір бірінен ажырамайтын егіз ұғым. Қиындығы мен қызығы, жауапкершілігі, шығармашылығы қатар жүретін осы бір мамандықты таңдағаныма еш өкінбеймін. Себебі: Мұғалім – әлемдегі ең үздік мамандық! Эссе жазған математика пәні мұғалімі: Ибрагимов Н.Е. Мектеп директоры: Утебалиев А.Ш.

1 слайд