Әл-Фараби атындағы ҚазҰУ-дың заң факультетіне 70 жыл

1934 жылы құрылған әл-Фараби атындағы Қазақ ұлттық университеті Қазақстанның жетекші білім беру және ғылыми орталығы болып табылады. Университет әр түрлі білім салаларының, соның ішінде Құқықтану саласының мамандарын даярлауда шешуші рөл атқарады. 1955 жылы ірге тасы қаланған Заң факультеті көптеген жаңару мен өзгерістерді басынан өткерді. Қазіргі таңда аталмыш факультет «Құқықтану», «Кеден ісі» және «Құқық қорғау қызметі» мамандықтары бойынша мамандарды дайындайды. Студенттерді даярлау үдерісі жоғары білім негізінде жүзеге асырылады. Сонымен қатар, Заң факультетінің студенттеріне магистратура және PhD докторантурасына түсуге мүмкіндіктер қарастырылған.

Факультеттің айтарлықтай ғылыми әлеуеті мен кадрлық ресурсы бар. Оның құрамында ҚР Ұлттық ғылым академиясының 15 академигі, 30-ға жуық докторлар мен профессорлар, 70-тен астам ғылым кандидаттары, 30 PhD докторлар, сонымен қатар ҚР Парламенті, ҚР Үкіметі, ҚР Президенті Әкімшілігі, ҚР Жоғары Соты, Құқық қорғау органдары мен Ғылым академиясы қызметкерлерінен құралған жоғары тәжірибелі мамандар дәріс жүргізеді. Олардың басым көпшілігі шет тілдерін меңгерген, АҚШ, Еуропа, Түркия және өзге де мемлекеттерде тағылымдамадан өтіп келген.

Заң факультеті мемлекет пен құқықтың өзекті мәселелері бойынша республикалық және халықаралық конференциялардың, сондай-ақ Қазақстан студенттері арасында жыл сайынғы республикалық құқықтық олимпиаданың тұрақты ұйымдастырушы болып табылады. Факультеттің білім беру бағдарламалары халықаралық стандарттарға сәйкес келеді және Қазақстанның құқықтық жүйесінің талаптарына бейімделген. Факультет түлектері елдің құқықтық жүйесінің дамуына елеулі үлес қоса отырып, мемлекеттік құрылымдарда, халықаралық ұйымдарда және жеке заң компанияларында сұранысқа ие мамандарға айналады.

Сонымен қатар, Заң факультеті шетелдік университеттермен және ғылыми орталықтармен белсенді жұмыс істейді, бұл оның студенттері мен оқытушыларына халықаралық білім беру және ғылыми жобаларға қатысуға мүмкіндік береді. Осындай ынтымақтастықтың арқасында академиялық ұтқырлықтың жоғары деңгейі, озық ғылыми әзірлемелерге қол жеткізу және құқық саласындағы жетекші мамандармен тәжірибе алмасу мүмкіндігі қамтамасыз етіледі. Бұл білім беру сапасын арттыруға ғана емес, сонымен қатар факультеттің халықаралық аренадағы позициясын нығайтуға ықпал етеді.

М.К.Бисенова

Әл-Фараби атындағы ҚазҰУ-нің, Заң факультетінің, қылмыстық құқық және іс жүргізу, криминалистика кафедрасының з.ғ.к., қауымдастырылған профессоры

Е.Б.Ергеш

ҚазҰУ-нің, Заң факультетінің 1-курс магистранты