Ашық сабақ Өз мұратыңа жету 8 сынып

Мақсаты: Оқушыларға алдына дұрыс мақсат қою арқылы өз мұратына жететіндігін түсіндіре отырып, ақиқат құндылығының мәнін ашу.

Міндеттері:

1. Білімділік: Оқушыларға өз мұратыңа жетуде сенімділік қасиетінің маңызын түсіндіру.

2. Дамытушылық: Оқушылардағы шыншылдық қасиеттерін дамыту.

3. Тәрбиелік: Оқушыларды ойдың, сөздің және істің бірлігінде өмір сүруге тәрбиелеу.

Сабақтың барысы:

1. Ұйымдастыру кезеңі.

2. Амандасу

3. Оқушыларды топқа бөлу(конфет арқылы)

5Т – ережесі:

1. Тәртіп.

2. Талап.

3. Тыныштық.

4. Тазалық.

5. Татулық.
Балалар ережені есімізге түсіріп, сыныптың тәртібін сақтап, оқып - білуге талаптанып, тыныштықты орнатып, тазалықты сақтап, бүгінгі күнімізді татулықпен өткізейік.

Тыныштық сәті. Су асты патшалығына ойша саяхат. (Оқушылардан шеңбер құрып отыруды, қолдарын тізесіне немесе үстел үстіне қоюды, аяқтарын айқастырмауды өтініңіз. Арқаларын тік ұстауын қадағалаңыз. Жайлы, баяу музыка қойыңыз).

Мұғалім: Көзіңізді жұмыңыз және бірнеше рет терең тыныстаңыз; денеңізді босатыңыз. Бірнеше секундтан соң теңіз түбіне саяхат жасаймыз.

Теңіз жағасымен келе жатқаныңызды елестетіңіз. Толқындардың жеңіл шалпылына, шағалалардың шуылына құлақ түріңіз. Жалаң аяқтарыңызбен құмды сезініңіз. Шалғайдан қара нүкте көріп тұрсыз: ол жақындаған кезде дельфин екенін түсіндіңіз. Ол сізді теңіз түбіне алып кету үшін келді. Ол өте әдепті жәндік, сізді шыдамдылықпен күтіп тұр. Жайлап оның арқасына отырыңыз, мықтап ұстап, жолға шығыңыз. Дельфиннің арқасында жайланып отырып, өзіңді қауіпсіз сезіну, су астында жүзу қандай керемет. Жан-жағыңызға қараңыз: мұнда кемпірқосақ тәрізді арлы-берлі жарқырай қалқыған әсем балықтар қаншама. Теңіз түбіне бойлаған сайын айнала қалайша өзгереді, суда тербелген қаншама ғажайып балдырлар. Қараңызшы, қандай орасан зор балықтар, ал енді анау жаққа көз тастаңыз... бұл орасан зор сегізаяқ. Су асты неткен қызықты әрі ғажап әлем. Сіз бір нәрсені байқадыңыз ба? Мұнда неткен тұңғиық, толы тыныштық. Осы тыныштық күйде болыңыз.(Мұғалім бірнеше секунд үнсіз қалады).

Ал қазір жоғарыға, өз әлемімізге кері қайтуға дайындалыңыз. Айналаға жіті қараңыз. Ғажап түстерге тағы бір рет қараңыз және тыныштыққа құлақ түріңіз. Осындай тыныштық сізге самалдай әсер береді. Енді дельфин кері қарай жолға шықты. Сіз су бетіне шықтыңыз, жағаға жақындадыңыз. Дельфиннің арқасынан түсіңіз, оны сипалаңыз және осындай ғажап саяхатқа апарғаны үшін оған ризашылық білдіріңіз.

Сыныпқа оралыңыз және өз орныңызға келіңіз. Бірнеше секундтан соң көзіңізді ашыңыз,күлімсіреңіз, осы түйсінген тыныштықты өз бойыңызда сақтауға тырысыңыз. Рахмет!

1.Жаттығу барысында не сездіңдер?

2. Қандай күйде болдыңдар?

3. Жүректеріңмен тыныштықты сезе алдыңдар ма?

2. Үй тапсырмасын тексеру. 1.Өзін ­ өзі тану сабағында неше құндылықтар бар? 2.Құндылықтарды ата.

№21, «Бақыт іздеушілер» ертегісін оқып келу.

Сұрақтар:

1. Мәтін не жайында айтылған?

2.Байдың үш баласы кәсіпті қалай іздемекші болды?

1. 3.Бақыт іздеуші кіші баласы кімдерге жолықты?

4.Жігіт өзіне тапсырылған аманаттарды қалай орындады?

5.Жігіт қандай қасиеттерінің арқасында мақсатына жетті?

6.Өзің мұратыңа жету үшін қандай жолды таңдар едің?

7. Мақсатыңа жету үшін адам өзіне қандай құндылықтарды серік етуі мүмкін?

1. Түйін: Ендеше Мақсат — белгілі бір межеге қол жеткізуге бағытталған әрекеттің ой-санадағы көрінісі. Мақсат ойлау нәтижесінде болашақты алдын ала болжау арқылы туатын мұрат, ішкі қозғаушы күшті Мұрат – адам бойындағы терең мақсатты, асыл арманды, үлгі-өнегені білдіретін ұғым.

3. Сабақтың дәйексөзі.

(Оқушыларға екі рет айтқызып, дәптерге жаздырту)

«Бойыңызға болашақтың арман-мұраттарын дарытыңыз,оның өзі шын мәніндегі күн шұғыласы тәрізді.»

Сұрақтар:

1.Қанатты сөздердің мағынасын қалай түсінесіңдер?

2. Неліктен мұғалімнің құдіретін күнге теңеп тұр?

3. Күншуақты адам дегенді қалай түсінесіңдер?

Қорытынды:Ендеше балалар, күннің нұрындай шуағымызды шашып,сүйіспеншілікке толы өмір сүрейік.

5. Мұғалімнің сыйы: Ендеше балалар, мақсатыңа жетуге күш беретін мына сөздердге назар аударып, есімізге сақтап алайық.

Бейнефильм. «Мақсатыңа жет», «Бәрі өзіңнің қолыңда!»

1.Бейнефильмде не туралы көрсетілген?

2.Мақсат адамға не үшін қажет?

3.Мақсат қоюдың адам өмірінде алатын орны қандай?

4.Сіз өмірлік жолыңызды қалай таңдар едіңіз?

Түйін: Әр адамның алдына қойған биік мақсат-мұраттары болады. Осы мұратқа жету үшін адам қажымай,талмай еңбек ету керек екен.

5. Шығармашылық жұмыс, топпен жұмыс.

1 – топ: «Мейірімділік»

2 – топ: «Қайырымдылық»

3 – топ: «Сүйіспеншілік»

1-тапсырма-Үш топқа бірдей «Өз мақсатыңа қалай,қандай жолмен жетер едің?» Постер қорғау суретпен, мақал-мәтел,нақыл сөздермен, өлең жолдарымен.

2-тапсырма-Мұрат туралы мақал-мәтелдерді құрастыру

1-топ Жақсыға ерсең,жетерсің мұратқа,

Жаманға ерсең,қаларсың ұятқа.

2-топ Жан қиналмай жұмыс бітпес,

Талап қылмай мұратқа жетпес.

3-топ Ақырын-ақырын мінсе болар тор атқа,

Ақырындап барып жетсе болар мұратқа.

3- тапсырма-

1-топ Жағдаятты талдау

Төмендегі  хаттың  шешімін тауып , оған жауап жазыңдар.

«Салем, Ақжарқын!

Міне, «Болашақ»бағдарламасымен Лондонға келгеніме бір жыл болып қалды. Бастапқы таныстыру курсынан да сәтті өттім. Маған Англия өте ұнайды, адамдар да! Осында қалу ойым бар.

     Бірақ өзімді сенімді, өте жақсы сезінемін деп айта алмаймын. Неге екенін өзімде  түсіне  алмай жүрмін. Ойланған сайын  терең тұңғиыққа батып бара жатқандаймын.

Сен «Бәрі де адамның өз қолында»дейсің . «Бұл жерде немен айналысамын , қалай өмір сүремін?» деген  ой басымнан шықпайды. Алдыма белгілі бір мақсат қоюға  да , бір нәрсе жайында армандауға  да қорқамын. Жанымды жегідей жеген осы бір ойыммен  бөліскім келеді.

Сәлеммен, Алдияр.

(Оқушылар жауаптары тыңдалады.)

Түйін: «Мақсат дегеніміз адамның өз мұратына сәйкес өмірін өзгертуге  бағытталған әрекеті. Ол адам өміріне бағыт береді, қызығушылығын арттырады, болашағын  көз алдына елестетеді.

     Адам әр нәрсені мақсат етіп ала білмейді. Адамның алдына  қойған  мақсаттарында  болашағының жаымды келісімді, Құнды жақтары бейнеленеді».

2-топ « Өз мұратыңа жету» тақырыбында шағын шығарма жазу

3-топ «Арман,Мұрат,Мақсат» туралы 4 жол өлең шығару

4- тапсырма Үш топқа бірдей

«Менің түсінігімдегі ақиқат»тақырыбына төмендегі берілген тірек сөздерді қолдану арқылы әңгіме құрастыру:

Ар – намыс.

Шындық.

Адалдық.

Уәде.

Азаматтық.

Жақсылық.

Қымбат өмір.

Абырой.

Кеңпейілділік.

Ақкөңілділік.    

Құндылықтар терегін көрсете отырып,осы ағаш әдемі болып өсуі үшін, оған тамыры, су,діңі,бұтағы, жеміс қажет екенін ұғындыру.

Тамыры-ақиқат.Кездескен қиыншылықтардың ақиқатын танысақ,қиыншылықты жеңеміз.

Су-сүйіспеншілік.Барлық істерімізді сүйіспеншілікпен жасасақ, ол ісіміздің жемісін көреміз.

Діңі-дұрыс әрекет.Әрбір ісімізге есеп беретін болсақ, біз тура жолдан таймаймыз.

Бұтағы-ішкі тыныштық.Дұрыс әрекет жасай отырып, ішті тыныштыққа жетеміз.

Жемісі-қиянат жасамау.Адамдарға оймен,сөзбен,іспен қиянат жасамасақ,бақытты өмір сүреміз.

Сұрақтар:

1.Қандай құндылықтармен таныстық?

2.Күнге ұқсау үшін бізқандай әрекет жасауымыз керек?

Қорытынды:

Сүйіспеншілікпен өмір сүрсек, мінезіміз күннің нұрындай жайдары әрі шуақты болады.

6. Топпен ән айту.

Армансыз күндер болмайды әні Жазира Байырбекова

7. Үй тапсырмасы.

Келесі сабақ. №22, «Есею жолында» мәтінін оқып келу.

8. Сабақтың қорытынды сәті.

Мен сабағымды Абай Құнанбайұлының мына бір сөзімен аяқтағым келіп отыр

Сенбе жұртқа,тұрсада қанша мақтап,

Әуре етеді ішіне қулық сақтап.

Өзіңе сен,өзіңді алып шығар,

Еңбегің мен ақылың екі жақтап

Бүгінгі сабақтан игерген жақсы қасиеттерді есімізге түсіріп, жүрегімізге сақтайық.Сабақ аяқталды.Сау болыңыздар!Бүгінгі сабақтан алғандарың туралы жазу.