Түркістан – жас ұрпақ тәрбиесінің алтын ордасы

«Балдәурен» – бұл жай ғана демалыс орны емес. Бұл – өскелең ұрпақтың бойына ұлттық рух пен заманауи көзқарасты қатар сіңіретін, жастардың көшбасшылық қабілетін ашуға бағытталған іргелі тәрбие орталығы. Түркістанның тарихи әрі рухани мәртебесі біздің жұмысымызға ерекше жауапкершілік жүктейді.

Орталығымыздың басты тірегі – ұйымдастырушы-ұстаздар мен педагогикалық топ. Олар күн сайын балалармен тікелей жұмыс істеп, тәрбие мен сенімнің, талап пен мейірімнің үйлесімін қалыптастырып келеді. Әрбір ұйымдастырушы-ұстаз – идеясы мол, кәсіби шебер, балаларға үлгі бола алатын тұлға.

Біз педагогикалық топпен бірлесе отырып, жастардың бойында отансүйгіштік, еңбекқорлық, өзара құрмет пен жауапкершілік қасиеттерін қалыптастыруды басты мақсат етеміз. Инновациялық әдістер мен ұлттық тәрбиені ұштастыру – «Балдәурен» ұжымының негізгі ұстанымы.

Әр ауысымда орталығымызда мәдени-шығармашылық жобалар, патриоттық бағыттағы іс-шаралар, спорттық және зияткерлік бағдарламалар жүзеге асырылады. Бұл жобалар балалар үшін – даму алаңы болса, ұйымдастырушы-ұстаздар мен педагогтер үшін – кәсіби шыңдалудың нақты мектебі.

Мен үшін «Балдәуреннің» ең үлкен жетістігі – осы ортадан елін сүйетін, белсенді, жауапкершілігі жоғары жастардың қалыптасуы. Біз жастарға сенім артамыз, олардың әлеуетіне жол ашамыз және әр баланың болашағына бейжай қарамаймыз.

Түркістан төріндегі «Балдәурен республикалық оқу-сауықтыру орталығы» алдағы уақытта да жас ұрпақ тәрбиесі мен педагогикалық тәжірибенің үлгілі алаңы болып қала береді.

Түркістан төрінде жүзеге асып жатқан жастар тәрбиесіне бағытталған жұмыстар туралы ой бөлісуді жөн көрдім.

Сандыбаева Лаззат Туребеккызы

Филиал директорының оқу-тәрбие

ісі жөніндегі орынбасары