Бес әлеуметтік бастама – басты бағдар

ҚР Президенті Н.Ə.Назарбаевтың Қазақстан халқына үндеуі.

Бес әлеуметтік бастама – басты бағдар

Елбасымыздың түрлі форумдар мен конференцияларда сөйлеген сөздері мен Жолдаулары – елімізді дамытудың, халықтың əл-ауқатын арттырудың айқын бағыт-бағдары болып табылады.

«Қазақстан-2030», «Қазақстан-2050» стратегиялары, «Мәңгілік ел» патриоттық актісі, «Төртінші өнеркәсіптік революция», «Рухани жаңғыру», «100 нақты қадам» сияқты ұлттық жоспарлы бастамалары табысты жүзеге асырылуда.

2018 жылдың наурыз айының 5-жұлдызында Мемлекет басшысының Парламент палаталары мен Үкіметтің қатысуымен өткен бірлескен отырысында Елбасы Н.Назарбаев Қазақстан халқына «Бес әлеуметтік бастама» атты үндеуі жолдады. Әлеуметтік жаңғыртуға бағытталған бес бастаманы белгіледі. Ол бастамасында әрбір отбасына баспана алудың жаңа мүмкіндіктерін беруді, жалақысы төмен жұмысшылардың еңбекақысын көбейту үшін олардың салық жүктемесін азайтуды, жоғары білім алудың қол жетімділігі мен сапасын арттыра отырып, студенттердің жатақханадағы жағдайын жақсартуды, шағын несие беруді көбейтуді, елді газбен қамтамасыз етуді жалғастыруды қамтиды. Н.Назарбаев жаңа әлеуметтік бастамалары қоғамымыздың әлеуметтік бірлігін нығайтуға және әрбір қазақстандықтың əл-ауқатын əрі қарай жақсартуға бағытталғанын атап өткен болатын.

Президент бірінші бастамасында әрбір отбасына баспана алудың тың мүмкіндіктерін қарастырып, қолжетімді баспанамен қамтамасыз етудің «7-20-25» бағдарламасын ұсынды. Яғни, ипотекалық несие мөлшерін 7, бастапқы жарнасын 20% төмендетіп, мерзімін 25 жылға ұзартпақ. Бұл мəселе баспанасы жоқ талай отбасының жағдайын жақсартуға қызмет етеді. Жұмыс істейтін әрбір адамның несиеге пәтер сатып алып, оны отбасылық бюджеттің мүмкіндіктері арқылы төлеуге жағдай жасалмақ. Ел президентінің өз Үндеуінде айтып отырған тағы бір маңызды мәселелерінің бірі – жоғарғы білімнің қол жетімділігі мен сапасын арттыруға негізделген. Грант санын көбейту, оның ішінде техникалық мамандықтарға басымдық беру – жастарға жасаған үлкен мүмкіндік. Бұл шаралар оқушылардың оқуды бітіргенде жоғары білім алуға жасалынған жағдай болса, екіншіден адам ресурстарына салынатын үлкен салым болмақ. Бұл жердегі мәселе жоғары білім алғаннан кейін жастарды жұмыспен қамту. Себебі, адам білімі молайған сайын оның сұранысы да жоғарылайтыны түсінікті. Жоғары білім алушылардың санына қарай, жұмыс орындары да молая түсуі тиіс.

Елбасы осы аталған бастамаларды алға тарта отырып, бұл тұжырымдарды жаңартып, еліміздегі әлеуметтік сенім мен татулықты одан әрі дамытпақ ойда. Президент жолдауларының ерекшеліктері жок осындай нақтылығында. Ал біздер осы нақтылықты қолдай отырып, осы міндеттер аясында еңбек етуіміз қажет! Бұл бастама – берекенің бастауы! Бұл бастама – нық қадамның негізі!

Абдулмуталапқызы Жадыра

№8 П.Д.Осипенко атындағы орта мектептің

Қазақ тілі мен әдебиеті пәні мұғалімі

Қызылорда қаласы