Тақырыбы: «Болашақ қаласы»
Сабақтың тақырыбы: Болашақтағы қала 
Сабақтың мақсаты: оқушылар тақырып бойынша өз жобасын жасайды. 
Міндеттері: 
-«Қалалар модулі бойынша алған білімдерін пайдалана отырып, өз ойларын ауызша, жазбаша (шағын шығарма, сызба т.б. түрінде) жеткізеді; құрмалас сөйлемдерді талдау, оларды қолдана білу қабілеттері жетілдіріледі; 
-ойлау, елестету, қиялдау, шығармашылық қабілеттері дамиды; 
-армандай білу, жақсылық тілеу, болашаққа үмітпен қарай білуге баулимыз, басқаның пікірін тыңдай білуге, өзара сыйластыққа тәрбиеленеді. 
Сабақтың түрі: жарыс сабақ 
Әдістері: сұрақ-жауап, баяндау, жоба қорғау, тілдік жаттығулар; топтық, жекелеме жұмыс, шығармашылық жұмыс. 
Пәнаралық байланыс: тарих, география, бейнелеу өнері. 
Көрнекілігі: жарыс барысын белгілеп отыратын кесте; оқушылар жасаған Қазақстан картасы, жобалары (сызба, суреттері); жер шары бейнесіндегі плакат. 
Сабақтың барысы: 
I.Ұйымдастыру: сәлемдесеміз, сабақтың мақсаты, міндеттері айтылады, топқа өз қалаулары бойынша бөлінеді, алған бағалар ұпай болып жазылатыны ескертіледі. 
II.Үй тапсырмасы: Қазақстан картасын бейнелеп, ол бойынша қалаларға саяхат жасап әңгімелейді. (Сөйлеген оқушының тобына ұпай жазылып отырады). 
III.Жаңа сабақ. 
1.Мұғалім сөзі: «Балалар, біз бүгін қалалар туралы тақырыпты жалғастыра отырып, алған мәліметтерімізді, үйренген сөз, сөйлемдерімізді пайдаланып, «Болашақ қаласының» жобасын жасаймыз. Мынадай жұмыс түрлерін ұсынамын, өз қалауларың бойынша таңдайсыңдар. Бірінші – жобаны сызба, суреттер, слайд көрсетілімдері т.б. бойынша қорғау; Екінші – шағын шығарма жазу. Жоба жасау үшін оқулықта берілген сұрақтармен танысып алайық». 
2.Оқушылар сұрақтарды оқып, түсінбегендерін сұрап алады. 
-Қала қай жерде орналасады? 
-Бұл қалада ғимараттар қалай орналасады? Олардың түрі, көрінісі қандай? 
-Балабақшалар мен спорт алаңдары қайда орналасады? 
-Көлік және жаяу жүргіншілер жолдары қандай болмақ? Көліктің қандай түрлері болғаны жөн? 
-Өнеркәсіп орындары қайда орналасады? Демалыс орындары бар ма? Олар қандай және қайда орналасады? 
-Қоршаған ортаны сауықтыру мәселесі қалай шешіледі? 
3.Топта ақылдасып жұмыс түрін таңдайды. Шығарма жазушы жеке отырады. 
4.Жоба жасалады. 
5.Әр топ өз жобасын қорғайды. (Ұпай беріледі). 
6.Грамматикалық тапсырма: тақтаға әр топтан оқушы шығып, салалас құрмалас сөйлемдерді талдайды. Бағаланады. 
7.Шығарма оқылады, бағаланады. 
IV.Бекіту. 
1.Кестедегі ұпай сандары саналады, жеңімпаз топ анықталады. 
2.Жер шары тәріздес плакатта Алматы, Семей, Түркістан және «Болашақ қала» атаулары жасырынып тұрады. Оқушылар келесі сұрақтарды шешу арқылы жасырынған қала атауын табады: 
«Кезінде бұл қала еліміздің астанасы болған. (Алматы) 
Ол көне қала, Шабғар, кейін Йаса деп те аталған, қазір мұнда туристер көптеп келуде. (Түркістан) 
Бұл жерді қасиетті деп айтады, себебі ұлы адамдар дүниеге келген. (Семей) 
Бұл қала ең әдемі, көрікті қала болады және мұнда өзара тату, тыныштықты қалайтын адамдар тұратын болады». 
3.Мұғалімнің қорытынды сөзі: «Бүгінгі сабақта сендер өз ой, қиялдарыңа ерік беріп, болашақты елестетіп, қала бейнесін жасауға тырыстыңдар. Айтқан пікірлерің бәрі дұрыс, келешекте ескеруге тұрарлық пікірлер айтылды, өйткені сол болашақты жасаушы сендерсіңдер. Сол үшін ақ ниет пен талаптарың болсын. Осы жолда сендерге тек сәттілік тілеймін. Ең бастысы, елімізде тыныштық сақталсын!»