Деңгейлеп оқытудың пайдасы

Әсемгүл Ахметова Мақабылқызы

А.Нүсіпбеков атындағы орта мектебінің математика пәні мұғалімі

Адамзат баласының өз ұрпағын оқыту мен тәрбиелеудегі ең озық , тиімді әдістерін , тәжірибелерін жалғастырып, тың жолдар іздеу , жаңашылдықпен дамыту қашанда жалғаса бермек.

Сабақ үрдісінде небір күрделі қиындықтар кездеседі. Бүгінгі таңда озат педагог-ғалымдар, тәжірибелі мұғалімдер ойлап тапқан сабақты түрлендіре өткізудің жаңа тәсілдері жеткілікті. Осындай технология-лардың бірі-профессор Ж.А.Қараевтың деңгейлеп саралап оқыту технологиясы.

Оқушылардың ой-өрісі мен дүние танымын кеңейтіп, білім аясының мейлінше өсуіне оқушылардың қабілетіне қарай деңгейлеп саралап оқытудың ықпалы зор.

Деңгейлеп саралап оқыту технологиясы дегеніміз- оқушының туа біткен ақыл –ой қабілетінің жеке даму жан-жақтылығына негізделген білім жүйесі.

Деңгейлеп саралап оқыту технологиясының мақсаты: Әр оқушыны оның қабілеті мен мүмкіндік деңгейіне қарай оқыту. Оқытуды оқушының әр түрлі топтарының ерекшелігіне сәйкес бейімдеу, ыңғайлау.

Ерекшелігі: Біріншіден: Таланттылар өздерінің қабілеті мен икемділігін одан әрі бекіте түседі, әлсіздер оқуға ниет білдіріп, сенімсіздіктен арылады.

Екіншіден: Оқушылардың оқуға деген ынтасы артады.

Үшіншіден: Білім дәрежесі бірдей топтарды оқыту ісі жеңілдейді.

Менің мақсатым: оқушылардың ойлау қабілетін дамытып, өздігінен шығармашылықпен жұмыс істеуге баулу. Өз сабағымда деңгейлеп-саралап оқыту технологиясының әдісін жиі пайдаланамын.

Мен өз тәжірибем арқылы сыныптағы оқушылардың білім деңгейіне қарай , топтап, яғни топқа бөліп оқытудың нәтижелі болатындығын байқап келемін. Сыныптағы оқушыларды білім дәрежесіне қарай үш топқа бөлемін. Әр топтың өз жеткешісі болады. Әр деңгейде оқушылар біліміне қарай орналасады. Мұнда барлық оқушылар қамтылады. Берілген тапсырманы бәрі бірігіп, өзара ақылдасып, бірі түсінбегенін екіншісі түсіндіру арқылы дұрыс орындап шығуға мүмкіндік алады. Сонымен қатар оқушылар өз беттерімен жұмыс жасау арқылы ойлау қабілеттерін дамытып отырады. Барлық оқушылар өз жұмысын ең төменгі деңгейдегі тапсырманы орындаудан бастайды да , оны орындауына сәйкес келесі деңгейге көшіп отырады.

Қорыта айтқанда осындай жұмыстар арқылы оқушылар арасында ұжымдық қарым-қатынас қалыптасады. Оқушыны жауапкершілікке тәрбиелейді. Жаңа технологияны пайдалану оқушылардың білімге деген қызығушылығын арттырады.