Эссе: "Апаттарға қарсы азаматтық қорғаныс"

Апаттарға қарсы азаматтық қорғаныс

Өмір – адамға бір-ақ рет берілетін баға жетпес қымбат сый. Дегенмен, сол өмірге түрлі себептер өз зиянын тигізіп жататынын қарапайым өмірде көріп, естіп жатамыз. Бірден-бір себеп – табиғи апаттар. Атап айтар болсақ, жер сілкінісі, құйынды дауыл, су тасқыны, қар көшкіні,сел, өрт, түрлі көлік апаттары, т.б.

Еліміздің таулы аудандарында сел, қар көшкіні құбылыстары болу қаупі бар. Дер кезінде алдын алу шаралары жасалмаған жағдайда үлкен материалдық шығын мен адам шығынына ұшырауы әбден мүмкін. Алматы қаласын селден сақтау үшін Медеу бөгені салынған және таулы аймақтарда сол жөнінде дер кезінде хабар беретін қондырғылар орнатылған. Ата-бабаларымыз ерте уақытта аспан құбылыстарына қарап, үй жануарларының мінез-құбылыстарының өзгеруіне қарап болжам жасап отырған.

Кейбір апаттарға адам әрекеті де себепші болады. Жақында ғана Алматы қаласы, Қызыл ту ауылында болған әуе ұшағының, Шамалған ауылында болған пойыздың апатқа ұшырауына тікелей себеп – адамдардың іс-әрекеті, ұшақтың ұшар алдындағы, пойыздың жүрер алдындағы дайындығын тексерудегі кеткен механиктердің қателігі, пойыз жолдардың ескілігі. Салдарынан қаншама адам жан қиды, қаншама бала қыршын кетті.

Кеше ғана теледидар жаңалығынан Талдықорған обылысында мектептен қайтқан баланың талдың астында қалып, зардап шеккені хабарланды. Оның себебі, ұзын болып өскен ағаштардың уақытылы кесілмеуі болып отыр. Елімізде мұндай мәселелер жиілеп кеткені көңіл қуантпайды.

Бүгінде жиі болатын апаттардың қатарында тілсіз жау – өрт те бар. Көп қабатты үйлерде жиі кездесетін өрттен де қаншама адам зардап шегуде. Лаулап жанған оттың ортасына түсіп, сегіз бірдей баланы аман алып шыққан Тараздық жігіт Нұркен Дүйсенбаевтың ерлігіне тәнті боласың. Мейрамханада күзетші болып жұмыс жасайтын 21 жасар жігіт көрші үйде болып жатқан өртті көре салысымен жүгіріп барып, 8 баланы терезеден алып шығып, тілсіз жаудан арашалап қалады. Осындай ағалар ерлігі біз секілді өскелең жас ұрпаққа үлгі.

Жыл сайын 1- наурыз күні Дүниежүзілік азаматтық қорғаныс күнін тойлаймыз. Мектепте ұстаздарымыз табиғи апаттар мен жаһандық қатерлерге байланысты түрлі шаралар өткізеді, су тасқыны, өрт жағдайы, қар көшкіні секілді төтенше апаттық жағдайларға төтеп беру, алдын алу шараларына баулиды. Қандай жағдай болмасын біз әрқашан өзімізді, жанымызға жақын жандарды қорғауға дайын болуымыз керек.

Сол себепті мен болашақта елімнің тыныштығын күзететін - Әскери адам болғым келеді. Республикамның әрбір адамы Тәуелсіздіктің ашық аспанында бейбіт өмір кешіп, өз өмірінің қорғаныста екеніне зор сеніммен жүрсе екен деймін.