Эссе "Болмасаң да ұқсап бақ"

Амантай Хабиба

3 «А» сынып оқушысы

№36 жалпы білім беретін орта мектебі

Қарағанды қаласы

Жетекшісі Сексеналина Д.К

БОЛМАСАҢ ДА ҰҚСАП БАҚ...

(Эссе)

Әрбір адам баласы өмірде ұлы тұлғаларға еліктеп, сол тұлғалардың жасаған ісін, жүрген жолын қайталағысы келеді. «Армансыз адам, қанатсыз құспен тең» дейді. Сондықтан әрбір адам армандап, сол арманына біреуі жетіп, біреуі жетпей, тіпті біреулері одан да асып кетеді. Күндер өте келе, сол адамға қалай ұқсап бара жатқанын аңғармай да қалады.

Болмасаң да ұқсап бақ,

Бір ғалымды көрсеңіз.

Ондай бодмақ қайда деп,

Айтпа ғылым сүйсеңіз,-

деп Абай атамыз айтқандай, қойған мақсатқа жетуге ұмтылудан шаршамау керек.

Менің де өзімнің еліктейтін ұлы тұлғам бар. Ол кісі – менің ұстазым, Сексеналина Диана Кенжеқызы.

Диана Кенжеқызы –білімді, шыншыл, адамгершілігі мол, үлкенді үлкен деп, кішіні кіші деп құрметтеп, сыйлаған тұлға. Тек адал жолды таңдап, сол жолға барын салу керек дейді. Ол кісі жұмысқа деген белсенділігімен, көрегенділігімен, қарапайымдылығымен, кез келген ортада сөз тауып айтатын тапқырлығымен қадірлі. Әр оқушыны өз баласындай көріп, олардың жақсы болып өсуін тілеп, жақсы істерге баулып, үйретіп, әр ісіне қуанады. Әр сабағы бір-біріне ұқсамайтын өзгеше сабақтар. Ұстазым «сегіз қырлы, бір сырлы» десем, артық айтқаным болмас. Керек десеңіз, әуелетіп әсем ән де салады, мың бұралып би де билейді. Сонымен бірге бойындағы осы қасиеттерді бізге дарытуға тырысады. Мен кейде ұстаз атаулының барлығы осындай ма деп таң қаламын.

Алдындағы әр оқушы әртүрліміз. Біреуіміз қабілеті, енді біреуіміз мүлдем бей-жаймыз. Осы мінезімізге қарамастан ұстазымыз әрқайсымыздың кілтімізді табады. Білім саласында болып жатқан байқауларға, жобаларға қатарымыздан қалдырмай, бағыт беріп, қатыстырып жатады. Диана мұғалімнің шәкірттері әрқашан да жүлделі орындарға ие боламыз. Бұл- ең әуелі ұстазымыздың еңбегі. Сол себептен, мен ол кісіні үлгі тұтамын. Өзімнен кішілерге үлгі болатындай іс жасап, білімді азаматша болғым келеді.

Ғылым мен техниканың дамыған заманы болғандықтан, өте ұшқыр идеялы жастар мен нағыз ұлтжанды азаматтарды талап етеді. Өмірде ең басты екі таңдаудан қателеспеу керек деген бар емес пе? Соның бірі – мамандық таңдау. Менің болашақ мамандығым – мұғалім. Ұстазым секілді адами құндылықтарды бойыма сіңіре отырып, білімді болуды мақсат тұтамын. Бәлкім, менің ұстазым да өз ұстазын балалық шағында ұстаз тұтқан болар. Мұхтар Шаханов ақын атамыз айтқандай, «бір адамға байланысты, бір адамның болашағы».

Диана ұстазымның жетекшілігімен «Сағаттың шығу тарихы» атты ғылыми жобаға қатыстым. Жоба жасау барысында ұстазым маған жаңа бағыттар көрсетті. Ғылыми жұмыс дегеннің не екенін түсіндім. Ерен еңбек қажеттігін ұғындым. Осы жобаны қорғап, нәтижесінде 1-орынға ие болдым. Менің жетістігіме ұстазым қатты қуанды. Әрине, бұл- ең әуелі мұғалімімнің жеңісі екені айтпай-ақ белгілі ғой. Қалалық, облыстық, республикалық сайыстардан мені қалдырмайды. Мүмкін маған деген сенімі шығар. Әр сайыс бізді шабыттандырады, біздің жетістігіміз ұстазымыздың бізге деген сенімін нығайта түседі. Жетістікке жету жолында қыруар энегия жұмсайды. Сонымен ұстазым масаттанады.

Білім беру ісі өте жауапты. Білім беру ордасы өте қасиетті. Осындай ордадан шыққан әр оқушы өз ұстазының еңбегін бағалай білуге тиіс.