Жаңғыру жолындағы жас маман рөлі

Мен бақыттымын! Тұғырлы тәуелсіздігі, көк аспанда қанатын кеңге серпіп, қияға қанат керген, күн астындағы қыран бейнелі көк туым, қос қанатты пырақ шаңырағымды қорғаштап, қанатына ақ бидайымыздың бейнесін салған, маңдайымызда жарқыраған жұлдыз, қақ жүрегімізде «Қазақстан» деп алтын әріпті еліміздің есімі жазылған еңселі елтаңбам, әуені құлаққа келгенде, қолын жүрегіне қойып, мақтанышпен шырқайтын әнұранды бейбіт елде дүниеге келдім.

«Еліміздің болашағы – жас ұрпақтың қолында, жас ұрпақтың тағдыры – ұстаздардың қолында» - деген Елбасымыз. Біз жас ұрпақ қазіргі кезде білім, ғылым, мәдениет, өркениеттің нағыз дамып, өскіндеп келе жатқан тұсында өмір сүрудеміз. Осы орайда, білім беру саласында жүрген жас маман ретінде менің де айтарым бар. Еліміздің біртуар азаматы Ж.Аймауытов «Сабақ беру – үйреншікті жай ғана шеберлік емес, ол – жаңадан жаңаны табатын өнер» - деген екен. Елбасымыздың «100 нақты қадам» Ұлт Жолдауында білім саласын арттыруда жаңа стандарттарды енгізу бойынша нақты тапсырмаларды белгілеп берген.

Қазіргі заман талабына сай - ұстаз шығармашыл, озық ойлы, жаңашыл болуы тиіс. Жаңартылған оқу бағдарламасына сәйкес, шығармашылық ұстазы С.Л.Рубенштейнннің сөзімен «Жаңа материалдық және рухани құндылықтар жасайтын қоғамдық мәні бар адам әрекеті» - деп түсіндірілген екен. Демек, заманға сай ұстазға дәріс беріп қана қоймай, барынша қабілетті, дарынды, шығармашыл ұрпақ тәрбиелеу міндеті тұр. Халқымызда «Баланы өз тәрбиеңмен емес, ұлтыңның тәрбиесімен тәрбиеле» деген қанатты сөз бар. Оқытушы оқушының бірсарынды білім алуын ғана емес, оның ой қызметін, шығармашылық мүмкіндіктерін, сонымен қатар, ұлтына, жеріне, Отанына деген сүйіспеншілікке қатар баулуы тиіс деп білем.

Елбасымыздың «Рухани жаңғыру» бағдарламасында айтылғандай, «Ұрпақтар сабақтастығы» жобасы біздің басты бағдарымыз болу керек. Халық өзі дауыс беріп анықтаған 100 жаңа есімге қарап бой түзеп, Қазақстан қоғамын дамытудың «темірқазығы» етіп алсақ әбден болады. Сөзімнің тұздығы ретінде Нұрсұлтан Әбішұлының сөзін келтіре кетейін: «Жастар өмірдегі өзінің жеке табысын іздей отырып, жақындары, өз халқы және Отаны үшін жағдай туғызатын азаматтар болуы тиіс. Мен біздің жастарға сенемін». Бізді өркениетке апарар жолдың бастауы – мектеп десек, мектептің басты тұлғасы, жүрегі – мұғалім. Жаңа инновациялық – технологиялық талаптарға сай қызмет істеу үшін алдымен мұғалім өзінің теориялық және әдістемелік білімін ұдайы толықтырып, үздіксіз ізденуі тиіс. Өз мамандығын жетілдіру, өзі қызмет ететін саладағы жаңалықтар мен озық тәжирбиелерді үнемі пайдалануға тиіс. Үздіксіз іздену – қазіргі кезде кез-келген мамандық иесіне қойылып отырған басты талаптардың бірі. Осының ішінде мұғалім шеберлігінің басты көрсеткіштерінң бірі – ғылыми жаңалықтар немесе озық технологиялық тәжирбені жетік игеру болып табылады. Жоғары технологиялар заманында адамға жан-жақты түрлі ақпарат келіп түседі, сондықтан қазіргі заман адамы ақпараттармен жұмыс жасай біліп, қажетін алып қолдана білу бейімділігін қажет етеді.

Қорыта келгенде ұстаз алдындағы ең басты көзделген мақсат әр алуан тәсілдерді қолдана отырып, оқушы санасына сапалы білім нәрін сіңдіру болып табылады. Қазақ халқының ағартушы ғалымы А.Байтұрсынов «Ауыздан шыққан сөздің бәрі сөйлем бола бермейді, айтушының ойын тыңдаушыға ұғарлық дәрежеде түсінікті болып айтылған сөздер ғана сөйлем болады», - деп атап көрсеткендей, оқу –тәрбие үрдісін ұйымдастырушылықпен жүргізуде және бала білімін саналы түрде жетілдіруде – мұғалім басты тұлға болып табылады.