“Жастар арасында құқықтық мәдениетті қалыптастыру”

Қоғамда «жастар – болашақ» деген сөз жиі айтылады. Бірақ сол болашақтың заңды қаншалықты білетіні, өз құқығы мен жауапкершілігін қаншалықты сезінетіні көп жағдайда назардан тыс қалып жатады. Құқықтық мәдениет – қағаздағы заңдар жиынтығы емес, адамның күнделікті өмірде заңға қалай қарайтынын көрсететін ішкі өлшем.

Бүгінгі жастар ақпаратты жылдам қабылдайды, бірақ оны сүзгіден өткізуге әрдайым уақыт таба бермейді. Әлеуметтік желіде біреудің құқығын таптау, ар-намысын қорлау, жалған ақпарат тарату «жай ғана пост» немесе «әзіл» болып көрінуі мүмкін. Алайда мұндай әрекеттердің артында нақты заңдық жауапкершілік тұрғанын көп адам ойлай бермейді.Құқықтық мәдениеттің әлсіздігі көбіне білім беру тәсілінен бастау алады. Заң тақырыбы жастарға көбіне құрғақ терминдермен, жаттауға ғана арналған пән ретінде ұсынылады. Ал шын мәнінде заң – өмірдің айнасы. Ол көшеде, университетте, интернетте, тіпті жеке қарым-қатынаста да қатар жүреді. Егер жас адам заңды өз өмірімен байланыстыра алмаса, ол қағаз күйінде ғана қалады.

Жастар арасында құқықтық мәдениетті қалыптастыру үшін қорқыту немесе тыйым салу жеткіліксіз. Керісінше, заңның не үшін керек екенін, оның адамның өзін қорғауға арналғанын түсіндіру маңызды. Өз құқығын білетін жас өзгеге де заңсыздық жасамайды. Себебі ол жауапкершіліктің салмағын сезінеді.Бұл бағытта бұқаралық ақпарат құралдары мен әлеуметтік желілердің ықпалы зор. Заң тілін қарапайым, түсінікті форматта жеткізе алған контент қана жастарға әсер етеді. Қысқа бейнелер, өмірден алынған жағдайлар, нақты оқиғалар арқылы берілген ақпарат заңға деген қызығушылықты арттыра алады.

Құқықтық мәдениет – міндеттелетін емес, саналы түрде қалыптасатын құндылық. Егер жастар заңды тек жазалау құралы емес, өз қауіпсіздігі мен еркіндігінің кепілі ретінде қабылдаса, қоғамдағы көптеген мәселе өздігінен шешілер еді. Заңды білу – тек мемлекетке емес, ең алдымен өзіңе керек.

Материалды дайындаған:Арайлым Бағдаулет,Жансая Әреджан

Әл-Фараби атындағы ҚазҰУ-дың 3-курс студенттері

Жетекшісі:фил ғ.к.,доцент Р.С.Жақсылықбаева