Жастар тәрбиесінің тиімді моделі: ЖОО дейінгі дайындық кафедрасындағы кәсіби бағдар беру жұмысы

Әл-Фараби атындағы Қазақ ұлттық университеті (толығырақ: https://farabi.university) құрамындағы ЖОО дейінгі дайындық кафедрасы талапкерлерді жоғары білімге дайындаумен қатар, олардың тұлғалық дамуына бағытталған жүйелі тәрбие жұмысымен ерекшеленеді. Кафедрада білім алушылардың құрамы көпұлтты әрі көпмәдениетті болғандықтан, тәрбие жұмысы осы ерекшелікке сай ұйымдастырылып, өзара құрмет, мәдени әртүрлілікті қабылдау және толеранттылық қағидаттарына негізделеді. Мұндай орта тыңдаушылардың тек білім алуына ғана емес, олардың жаһандық ойлау қабілетін қалыптастыруға да ықпал етеді.

Кафедрадағы тәрбие үдерісі білім алушылардың азаматтық жауапкершілігін дамытуға, қоғамдық белсенділігін арттыруға және тұлғалық қасиеттерін жетілдіруге бағытталған. Осы мақсатта түрлі мәдени-ағартушылық іс-шаралар, ғылыми-танымдық кездесулер, дөңгелек үстелдер мен пікірталас алаңдары ұйымдастырылады. Мұндай іс-шаралар тыңдаушылардың сыни ойлау дағдыларын дамытып, өз көзқарасын еркін білдіруге үйретеді. Сонымен қатар, кафедрада өткізілетін тәрбиелік шаралар жастардың кәсіби бағдарын айқындауға да оң әсерін тигізіп, олардың болашақ мамандығын саналы таңдауға көмектеседі. Әртүрлі мемлекеттерден келген тыңдаушылар үшін тілдік және әлеуметтік бейімдеу жұмыстары ерекше маңызға ие. Кафедрада қазақ және орыс тілдерін меңгеруге бағытталған сабақтармен қатар, тілдік клубтар мен бейресми қарым-қатынас алаңдары ұйымдастырылады. Бұл тыңдаушылардың жаңа ортаға тез бейімделуіне, академиялық үдеріске белсенді қатысуына және көпмәдениетті ортада еркін әрекет етуіне мүмкіндік береді. Сонымен қатар, мұндай ортада білім алушылар бір-бірінің мәдениетімен танысып, өзара тәжірибе алмасу арқылы дүниетанымын кеңейтеді.

Кафедра жұмысының маңызды бағыттарының бірі – ұлттық және жалпыадамзаттық құндылықтарды үйлестіру. Қазақстан қазақ халқының тарихи отаны ретінде таныстырылып, оның мәдениеті мен дәстүрлері құрмет негізінде насихатталады, сонымен бірге басқа елдерден келген тыңдаушылардың ұлттық ерекшеліктеріне де ерекше мән беріледі. Бұл қағидаттар негізінде қалыптасқан тәрбиелік орта өзара сыйластық пен түсіністікті нығайтып, жастардың халықаралық деңгейде бәсекеге қабілетті тұлға болып қалыптасуына ықпал етеді.

Сонымен қатар, кафедрада еріктілік қызмет, әлеуметтік жобалар және түрлі қоғамдық бастамалар кеңінен қолдау табады. Тыңдаушылар университет өміріне белсенді қатысып, түрлі мәдени және спорттық іс-шараларға араласады. Бұл олардың көшбасшылық қабілеттерін дамытып, ұжымда жұмыс істеу дағдыларын қалыптастырады. Осындай кешенді жұмыстардың нәтижесінде ЖОО дейінгі дайындық кафедрасы талапкерлерді тек академиялық тұрғыда ғана емес, рухани және әлеуметтік тұрғыда да жетілген тұлға ретінде қалыптастыратын тиімді білім беру кеңістігіне айналып отыр. Жалпы алғанда, бұл жүйелі тәрбие жұмысы Әл-Фараби атындағы Қазақ ұлттық университеті оң имиджін нығайтып, оны халықаралық деңгейдегі заманауи білім және тәрбие орталығы ретінде айқындай түседі.

ЖОО дейінгі дайындық кафедрасының аға оқытушылары Бегалиева А.Қ., Наралиева Р.Т., Мажиқызы Н.