Ж
үйкені жұқартқан жұмыссыздық

Автор: Балауса Есенгильди, 1-курс студенті

Күн сайын таңертең қала көшелерінде асығып бара жатқан адамдарды көресің. Бірі жұмысқа, бірі сабаққа, ал енді бірі жұмыс іздеуге бет алған. Соңғыларының жүзіне мұң ұялаған. Себебі жұмыссыздық тек қалтадағы ақша тапшылығы емес, ол адамның жанын қажытатын, жүйкесін жұқартатын ауыр күй.

Жұмыс жоқ” деген сөз бүгінде көптің аузында. Әсіресе, жастар арасында жиі айтылады. Университетті бітіргенімен, өз мамандығы бойынша қызмет табу қиынның қиыны. Мысалы, қарапайым заңгер, режиссер, филолог немесе журналист секілді маман иелерін айтуға болады. Олар жылдар бойы білім алып диплом алғанымен , университеттен алған білім өмір талабына сай болмағандықтан ,көпшілігі жұмыс таба алмай қиналады.

Алайда бұл мәселенің екінші жағы да бар

2025 жылдың 6 қаңтарында “Almaty TV News” арнасы Алматы қаласында жұмыссыздық деңгейі төмендегенін хабарлады. Ресми деректерге сәйкес, 2024 жылдың соңында бұл көрсеткіш 4,8%-дан 4,2%-ға дейін азайған. Сарапшылар мұны жаңа кәсіпорындардың ашылуымен және “Жастар тәжірибесі” секілді мемлекеттік бағдарламалардың тиімділігімен байланыстырады

Жұмыссыздықпен күресу тек мемлекет міндеті емес, әр адамның өз жауапкершілігі де. Қазір заман жылдам өзгеруде, жаңа мамандықтар пайда болып жатыр. Сол себепті өзіңді дамыту, жаңа бағыттарға бейімделу табысқа жетудің басты жолы.

Жүйкені жұқартқан жұмыссыздық – бүгінгі қоғамның күрделі дерті. Бірақ ол өмірдің соңы емес. Әр қиындық жаңа мүмкіндік. Бастысы әрекет ету, тоқтамау және өз қабілетіңе сену. Себебі өмір жұмыс орны емес, өз орныңды табу жолындағы күрес.