Көркем әдебиет «Қыс мезгілі»

Ұйымдастырылған оқу қызметі: «Көркем әдебиет»

Смагулова Гульнара Избергеновна

Ақтөбе қаласы, №41 «Назерке» мектепке

дейінгі ұйымының тәрбиешісі Тақырыбы: Қыс мезгілі

Мақсаты: Балалардың қысқы табиғаттағы мезгілдік өзгерістер туралы білімдерін бекіту. Әңгімелесу арқылы баланың байланыстырып сөйлесу қабілетін дамыту. Қыс мезгілінің сұлулығын тамашалай білуге тәрбиелеу және ойын арқылы шапшаң қимылдар жасау икемділіктерін арттыру.

Көрнекіліктер: Қар жамылған орман ағаштары, қыс суреттері, аю кейіпкері, орман сақшысы кейіпкері.

Әдіс-тәсілдер: Түсіндіру, сұрақ-жауап, әңгімелеу, ойын ойнау, саяхат. Ұйымдастырылған оқу қызметінің барысы: Тәрбиеші: Балалар біз үшін бүгін ерекше күн. Бізге қонақтар келіпті. Кәне, бәріміз қонақтармен амандасайық.

Шаттық шеңбері: Шеңбер болып тұрайық, Алақанды ашайық. Күннің нұрын алайық, Таза ауаны жұтайық. Жүрекке жылу салайық, Мейірімділік шоғын алайық, Жиналған жылы шуақты. Қонақтарға шашайық. - Балалар, қазір жылдың қай мезгілі?

- Қыс мезгілі.

- Қыста қандай табиғат өзгерістері болады?

- Суық болады, қар жауады, боран соғады.

- Адамдар қалай киінеді?

- Адамдар жылы киінеді.

- Қыста не жауады? Оның түсі қандай болады?

- Қыста қар жауады, оның түсі ақ болады.

- Сендер бақшаға келгенде қалай киінесіңдер? Тәрбиеші: Балалар енді экрандағы суреттерге қарап әңгіме құрастырайық. (Қыс мезгіліне қатысты суреттерді слайдтан көрсете отырып, сұрақтар қою).

- Кімдерді көріп отырсыңдар?

- Жылдың қай мезгілі? - Дала қандай екен?

- Балалар не теуіп жүр?

- Балалар шана, коньки, шаңғы теуіп жүр.

- Балалар қардан не жасады? - Аққала жасады. Тәрбиеші: Дұрыс айтасыңдар балалар, сендер қыс мезгілі туралы жақсы біледі екенсіңдер. Ал балалар біз көбінесе қайда серуендейміз?

- Саябақта, бақша ауласында серуендейміз.

- Біз бүгін балалар, қыс қызығын тамашалауға орманға барамыз. Барғыларың келе ме? Ол үшін біз орманға автобусқа мініп барамыз.

- Ендеше жылы киініп далаға шығайық. Мына өлең жолдарын бірге қайталап, жақсылап киініп алайық. Дала аяз балақай, Басыңа ки малақай. Қолыңа ки қолғап, Аяғыңа байпақ. Үстіңе жылы тон, Келе ғой бар ойнап.

- Міне, балалар орманға да келіп жеттік. Қандай тамаша, неткен көркем табиғат! Айнала тып-тыныш. Күн суық. Аю, кірпілер ұйықтап жатыр. Ағаштардың барлығы қар жамылған.

Тәрбиеші: Балалар, біз әрі жылынамыз, әрі көңіліміз көтерілу үшін бір сергіту сәтін жасап алайық. Сергіту сәті. Аппақ қылып өңірді, Қар жауды, қар жауды. Көңілді балалар, Қызығып секірді, секірді.

(Бір кезде ұйықтап жатқан аю оянып кетіп, маймаң басып, балалардың алдына шығады.)

Тәрбиеші: Балалар, біз аюды оятып жіберген сияқтымыз.

Аю: Мені ұйықтап жатқан жерімнен оятып жібердіңдер ғой. Тәрбиеші: Аю, ашуланбаңыз, балалар орманға қыс қызығын тамашалауға келді. Балалар қазір сенің көңіліңді көтеріп, жүрегіңді жібітіп жібереді. Ал, енді балалар, біз аюдың көңілін көтеріп «Аққала» құрастыру ойынын ойнап жіберейікші. (Балалар аққала құрастырады).

Аю: Ой, балалар қандай қызық ойын ойнадыңдар, өздерің көңілді балалар екенсіңдер. Менің көңілім көтеріліп қалды. Рахмет сендерге балалар. Мен енді барып ұйықтайын. (Аю шығып кетеді).

- Балалар біз қазір қайда жүрміз?

- Ормандамыз. - Нелердің дауысы естіледі? - Құстардың. - Ал сендер қандай қыстайтын құстарды білесіңдер?

- Сауысқан, қарға, көгершін, торғай, шымшық.

- Балалар бұл құстардың барлығы суыққа төзімді құстар. Біз оларға қалай көмектесуіміз керек? Яғни, балалар құстар біздің досымыз екен.

Тосын сый: (Орман сақшысы кіреді). Орман сақшы: Кім орман тыныштығын бұзған? Тәрбиеші: Сәлеметсіз бе? Орман сақшысы біз орманның тыныс тіршілігін тама-шалауға келіп едік. Сіз бізге осы орманның тыныс-тіршілігін айтып бересіз бе? Орманшы атай: Сәлеметсіздер ме балалар! Осы қыс мезгілінде келіп қалған екенсіңдер. Қыста орман ағаштары қар жамылып, орман іші тып-тыныш болады. Табиғаты әсем, керемет күйге бөленеді. Ормандағы ағаштардың пайдасы өте зор, олар зияны газдарды жұтып, бізге шипалы ауа береді. Ал, енді сендер маған қыс мезгілі туралы не айтып бере аласыңдар?

Тәрбиеші: Біздің балалар сізге қыс туралы тақпақтарын айтып берсін. Кәне балалар кім айтады? (Балалар тақпақтарын айтады)

Орманшы атай: Сендер, мына орманның ішіндегі құстарды, аңдарды және мені де бір қуантып тастадыңдар. Жарайсыңдар, рахмет сендерге балалар.

Тәрбиеші: Балалар біз біраз серуендедік, енді автобусқа отырайық. Орманда көрген қысқы қызықтарымызды әңгімелейік. Тәрбиеші: Балалар біз қайда бардық?

- Орманның ішінен қандай аңды кездестірдік? - Аюмен қандай ойын ойнадық? - Орманда тағыда кімді кездестірдік?

- Орман сақшысы орманда не үшін жүр деп ойлайсыңдар?

- Қыс мезгіліндегі орман саяхаты сендерге ұнады ма? (Балабақшаға автобуспен оралу)

Тәрбиеші: Жарайсыңдар, балалар бәріне жақсы жауап бердіңдер. Бүгінгі біздің орманға жасаған саяхатымыз жақсы өтті. Балабақшамызға жақсы көңіл күйде оралдық.