Макпал:Мектебіміздің мақтанышы

Мектебіміздің мақтанышы

Баланың қабілетін аша білген кез келген ұстаз өзі қалағандай білім де , тәлім де бере алады. Сондай дарыны мен қабілеті бірге үндесе білген, білімді білуге бейімделген шәкіртім жайлы сөз қозғағым келіп тұр. Менің шәкіртім бүгінде алған білімінің нәтижесін көруге дайындық жүргізіп жүрген бітіруші 11 сыныпта білім алуда.

Сейсенбай Динара мектеп табалдырығын аттаған сәттен бастап білуге, үйренуге құштар болды. Сол қабілетінің арқасында талай сайыстарда қатарластарынан оқ бойы озып келіп, бас жүлдені қанжығаға байлаумен болды. Жетістіктерін атап өтер болсам, 3 сыныпта «Самұрық» олимпиадасына белсене қатысқаны үшін мақтау қағазымен, 4 сыныпта «Алтын тобылғыға белсене қатысқаны үшін», 8 сыныпта аудандық пән олимпиадасында жүлделі 3-орынға ие болса, 10 сыныпта республикалық пәндер олимпиадасының аудандық кезеңінде физика пәнінен 3-орынға ие болса, аудандық «Балалар оқуы» кітап оқу сайысынан алғыс хатқа, «Абайтану» олимпиадасынан 3-орынды иемденді. Осы жылы аудандық «Алтын түлек» олимпиадасынан 3-орынды жеңіп алды. Бұдан өзге мектепішілік сурет салу, эссе жазу, түрлі пәндер мен өнер сайыстарында жүлделі орындарға ие болды. Мектептің қоғамдық жұмыстары мен ұйымдастыру істерінің белді мүшесі.

Бүгінгі жаңа басталған дәуір нағыз білімділер мен дарындылар заманы екені белгілі. Дарындылық – баланың басқа баладан ерекшелігі мен артықшылығы болса, шығармашылық – шынайы еңбек пен ізденуден пайда болатын қабілет. Шәкірттің бойынан осы екі қабілетті таба білген кезде ғана шәкірттеріміз шыңға шығары белгілі. Қазақта «бұлақ көрсең – көзін аш» дейді. Баланың бойынан қандай да бір ерекшелік пен қабілетті байқаған сәттен бастап, оның сол талантын дамытуға жол көрсете білгенде дарынды баламыз көптеген жетістіктерге жетеді. Мен де өз шәкіртімнің алдағы білімді сынар сынақта жоғары нәтижеге жетіп, өзі қалаған оқу орнының грант иегері боларына сенемін. Ұлтымыздың ұлы, келешегіміздің кемелді болуы осындай дарынды жастардың қолында екені ақиқат.