«Мамандығым – мақтанышым»

«Мамандығым – мақтанышым» 

Мен үшін жақсы мұғалім бәрінен де артық, өйткені мұғалім – мектептің жүрегі. (Ы. Алтынсарин)
Ұстаз – ұлы есім, ұлық маман иесі.Өмірде мамандықтың түрі өте көп. Әр мамандықтың өзіндік ерекшелігі бар. Сол мамандықтар ішінен мен ұстаз мамандығын таңдадым. Менің мамандығым – ұстаз. Бұл мамандықты таңдауымның себебі анамда ұстаздық еткен. Қиындығы мен қызығы мол осы мамандықты бала күнімнен армандадым. Сол ұстаз болуды анамнан қиындығын көрсемде мойымай ұстаз болуды шештім.

«Армансыз адам- қанатсыз құспен тең» -дегендей, оқушылар мектеп бітірген соң, өзі армандаған бір мамандықтың иесі болады. Жас жеткіншектер мамандық таңдауда қателеспеуі керек.Сол мамандық таңдауда қателеспедім десем болар еді.
Адамдар мамандықты жүрегінің қалауы бойынша таңдауы керек. Өйткені, әрбір адамның болашағы таңдаған мамандығына тікелей байланысты. Өз ісін жақсы көріп, үлкен жауапкершілікпен атқарғанда ғана бақытты болады дегендей қазіргі кезде менде бақыттымын.Мен қазіргі кезде бастауыш сынып және биология пәнінен сабақ беремін.Менің мамандығым ең қажет мамандықтардың бірі. Сондықтан мамандығымды мақтаныш тұтамын.

«Бала жүрегі – кішкентай күйсандық. Ол күйсандықтың кілтін тапсаң ғана ашылады. Мұғалімнің қолында әр кезде сол кілт жүруі керек» дейді заңғар ақын Мұхтар Шаханов. Жас ұрпақтың білімді де білікті, парасат – пайымы мол, саналы да білімді азамат боп жетілуі үшін тәлім мен тәрбие беріп жүргенім менің кеудемде мақтаныш сезімін оятады.Менің өмірдегі бақытым – жүрек қалауымен ұстаз болуым. Бұл сөзді мен жай ғана айта салмаймын өйткені бұлай айтуым – маған үлкен жауапкершілік жүктейді. Менің шәкірттерім егемен елдің, Тәуелсіз Қазақстанның толыққанды азаматы болып шықса, одан артық менде қайдан арман болсын.

«Ұстаз – ұлық емес ұлы қызмет» деген Бауыржан Момышұлының керемет дана сөзін әрқашан есіме аламын.
Ұстаздық атты ұлы шыңға көтерілу үшін өмір бойы оқисың. Өзің шын мәніндегі үлкен оқушы болғанда ғана кемел ұстаздыққа қол жеткізе аласың деп білемін. Ұстаз ретінде мен тек қана жалаң білім беріп қоюмен шектеліп қалмауға барынша тырысамын. Алдымыздағы әрбір бала қайталанбас бір ғажайып әлем десек, терең үңіліп, баланың басқаға ұқсамайтын ерекше қасиеттерін тану, оның жүрегіне, жан дүниесіне жол таба білу – біздердің, ұстаздардың бұлжытпас борышымыз. Мұғалім шын мәнінде баланы жан тәнімен беріле жақсы көру керек. Мейірімділік, шыдамдылық, кешіре білу, баламен тең жағдайда сырласу, оның мүмкіндіктеріне сену, ойын әрқашан құлақ қоя тыңдау тәрізді қасиеттері арқылы ғана мұғалім өз мәртебесін көтере алады. Халқымыздың ғасырлар бойы армандап, сан ғасырлар тоғысында қол жеткізген бақыты – тәуелсіздігіміз. Оның іргетасының мықты болып, нығаюы жас ұрпақтың терең білімі мен тәлімді тәрбиесінде.

Тусупова Бекзат Хайруллина