Мамандығым мақтанышым

Мамандығым - мақтанышым

«Армансыз адам –қанатсыз құспен тең» дегендей, әрбір адам дүниеге келіп, ес білген шақтан бастап болашақта кім болғысы келетіндерін айтып армандайды емес пе? Оқушылар мектеп бітірген соң жаңа өмірге қадам басып өздері армандаған мамандықтың иесі болу үшін алдарына мақсат қойып жетуге талпынады.

Мамандық – әрбір адамның болашағы, өмірі тікелей сол мамандықпен байланысты. Әр мамандықтың өз ерекшелігі бар. Соның ішінде ұстаздық жолын таңдап, «ағылшын тілі» пәнінің маманы болып қызмет етудемін. Тіл халықпен бірге өмір сүріп дамиды. Елбасымыз Н.Ә.Назарбаев: «Әрбір Қазақстандық үш тілді жетік меңгеруі керек. 2020 жылға дейін ағылшын тілін білетін тұрғындар саны біршама көбеюі керек», - деп айтқан еді. Себебі, қазіргі жаһандану заманында көп тіл білетін адамның қоғамда орны ерекше. Қазіргі таңда ағылшын тілінен дәріс беріп, шәкірттердің санасына ағылшын тілін үйренудің пайдасы ұшан теңіз екендігін үйретіп келемін. Қиындығы да, қызығы да жетерлік, ең бастысы жауапкершілігі жоғары мамандықтың бірі - ұстаздық ету деп білемін. Тілді үйренудің басты мақсаты оқушының іштей талпынысына, сана сезіміне, ұмтылысына тікелей әсер етеді. Сондықтан мектеп қабырғасынан бастап ағылшын тілін балаларға үйрету әр шет тілі пәндерінің ұстаздары үшін үлкен еңбекті, көп тер төгуді талап етеді. «Ұстазы жақсының ұстамы жақсы»-дейді халық даналығы. Расында да, еш нәрседен хабары жоқ бүлдіршіндерді білім нәрімен сусындатып, тәлімі мол тәрбиені бойына дарыта білу ұстаздардың арқасы емес пе? Шәкірттердің ықыласына бөленіп, олардан алғыс есту мен үшін үлкен қуаныш. Ұстазға одан асқан бақыт барма, сірә. Мен өз мамандығымды сүйемін. «Мамандығым-мақтанышым », -деп мақтана айта аламын.

«Түркістан» көпсалалы жоғары медицина колледжінің

«ағылшын тілі» пәнінің оқытушысы Султанмурадов Б.А.