1.Ұйымдастыру қозғаушы қызметі. Түрі.

Мақсаты: Әр түрлі мамандықтардың түрлері туралы түсінік беру.

-Балалар, қараңдаршы, бүгін біздің тобымыз күндегіден ерекше безендірілген және бізге көптеген қонақтар келген екен. Балалар бүгін бізде ерекше оқу іс – әрекет болмақ. Қане шаттық шеңберін құрып, бір – бірімізге жылы жүзбен қарап, бойымыздағы жүрек жылуын сыйлайық.

Біз ойнаймыз, біз ойнаймыз.

Кім болуды ойлаймыз.

Біз әртүрлі баламыз.

Игі істерге құштармыз

Білім алып ұстаздан.

Ел сеніміз ақтаймыз.

-Сәлеметсіздер ме!

-Здравствуйте!

-Good morning!

-Жарайсыңдар балалар.

2.Ұйымдастыру іздестіру.

Мақсаты:Сурет бойынша әңгіме құрастыруға, жұмбақ шешуге,ойлау, сөйлеу қабілеттерін дамыту.

-Балалар, бір жылда неше жыл мезгілі бар?

-Қазір жылдың қай мезгілі?

-Қыс мезгілінде неше ай бар?

-Қыс мезгілінде табиғат қандай өзгерістерге ұшырайды?

-Бір аптада неше күн бар?

Тәрбиеші: -Балалар, бүгінгі ұйымдастырылған оқу қызметіміздің тақырыбын ашу үшін мен сендерге жұмбақ жасырғым келіп тұр, тыңдаймыз ба?

Тәп – тәтті тамағы,

Астардың маманы…

-Аспазшы.

Кірпіштен сарай, үй салады,

Ол адам кім болады?

-Құрылысшы

Қолында қайшы, тарағы,

Тәртіпке шашты салады.

-Шаштараз.

Сауықтырар сырқатты,

Жылы үнмен тіл қатты.

-Дәрігер.

Мектептің жүрегі

Білімнің тірегі.

-Мұғалім.

Ала таяқ ұстаған,

Жол тәртібін нұсқаған.

-Полиция.

Дабылға тез жететін,

Жалынға сүңгіп кететін

Қиналса да түтінге,

Тайсалмайтын батыл кім?

Жасқанбайтын батыр кім?

-Өрт сөндіруші.

Ұшқыш емес, бірақ ол Аспанда қалықтап ұшады.

Оны кім деп ойлайсындар?

-Ғарышкер

Тәрбиеші: -Балалар бұлардың барлығын бір сөзбен қалай атаймыз? (мамандықтар)

Мамандық таңдау деген — өзің айналысқың келетін жұмысты таңдау ғана емес, өзің араласқың келетін ортаны да таңдау. Мамандық – қарапайым өмір сүру көзі болып табылатын және қандай да бір дайындықты, жауапкершілікті талап ететін еңбек қызметінің маңызды бөлігі. Біреулер үшін – ол ойға алған арманның орындалуы, отбасы дәстүрін жалғастыру, келесі біреулер үшін – жаңалыққа, дербестікке талпыныс, үшінші біреулерге — әйтеуір бір мамандық алу керек болған соң. Мамандық таңдау – тағдырыңды таңдау деген сөз. Кейінгі өмірде өкінбейтіндей, өз қабілеті мен бейімділігіне сай кәсіп түрін таңдау…
Тосын сәт: (Есік қағылып топқа Дымбілмес және оның достары келеді) Балалар топқа келген Дымбілместі көреді.

-Сәлеметсіңдер ме, балалар?!

Тәрбиеші: -Балалар бізге қонақ келген екен, қане амандасайықшы.

Дымбілмес: -Балалар, сендер мені таныдыңдар ма?

-Әрине таныдық, сіз Дымбілмессіз.

-Таптыңдар балалар, менің атым Дымбілмес. Мен ештеңе де білмеймін. Балалар, мен сендерден көмек сұрап келдім. Менің «Гүлдер қалашығымдағы» достарымда барлығының мамандықтары бар. Мысалы, Азат – полиция, Азиза –дәрігер, Төрехан – өрт сөндіруші, Нұрай-Аспазшы. Ал мен болсам, әлі күнге дейін кім боларымды білмей жүрмін. Мүмкін сендер маған көмектесіп, ақыл берерсіңдер?

Тәрбиеші: -Балалар, Дымбілмеске мамандық таңдауға көмектесеміз бе?

-Иә!

Дымбілмес: -Рахмет балалар, мен сендердің маған көмектесетіндеріңе сенгенмін!

Тәрбиеші: Дымбілмес, енді сенің достарыңмен танысайық.

Полиция-Төрехан

Тәртіп, заңды қолдайды,

Полиция елді қорғайды.

Мен полиция боламын.

Дәрігер-Азиза

Сыйлайтын саулық, амандық,

Дәрігер жақсы мамандық.

Мен дәрігер боламын.

Аспазшы-Нұрай

Жасайтын түрлі тағамдар,

Аспазшы жақсы мамандық.

Мен аспазшы боламын.

Өрт сөндіруші-Азат

Қай-қай жерде өрт шықса,
Дереу жетіп баратын,

Мен өрт сөндіруші боламын.

Дымбілмес: -Балалар, жарайсыңдар, сендерді тыңдап мен бірнеше мамандық атауларын жаттап алдым. Ой балалар, білім алған қандай қиын, сендер шаршаған жоқсыңдар ма?

-Жоқ, шаршаған жоқпыз.

Тәрбиеші: -Дымбілмес, сен шаршадың ба? Балалар, олай болса Дымбілмеспен бірге «Мамандықтар» жаттығуын жасайық.

Тас қалаушы жарайды,

Қабырғасын үйдің қалайды.

Сырлаушы боп мен енді

Сырладым төбе, еденді.

Мен – электрші – шам жаққыш,

Бұрап шамды жақтым.

Жаңа үйге кір көшіп

Бақытты өмір жүр кешіп. (Балалар жаттығу жасайды).

Тәрбиеші: Дымбілмес,енді сені қызықты тапсырмалар орындау үшін оқу орталығына шақырамын.

Билингвальды компонент: аспазшы-повар-cook, дәрігер-врач- doctor, полиция-полиция-police, өрт сөндіруші-пожарный- fireman, профессия-мамандық- profession.

Сөздік жұмыс: маман, тігінші, дәрігер, аспазшы, шаштараз т.б.

Дидактикалық ойын: «Кімге не қажет?»

Дұрыс па, бұрыс па» ойыны

/Дұрыс болса қол көтереді, бұрыс болса отырып қалады/

Қойшы балаларды оқытып жүр.

Жүргізуші машина жүргізеді

Аспазшы үй салып жүр.

Дәрігер адамдарды емдейді.

Жазушы хат, газеттер тасып жүр.

Дәрігер етік тігіп отыр.

Мұғалім балаларды емдеп жүр.

Ұшқыш әдемі киім тігеді.

Өрт сөндіруші өртті сөндіреді.

Суретші сахнада ән айтып тұр.

Шығармашылық жұмыс: Дәстүрден тыс сурет салу

Тәрбиеші: -Ал, Дымбілмес, біз бүгін сені көптеген мамандықтармен толық таныстырдық. Біздің көрсеткен сабағымыз, берген жауаптарымыз сенің көңіліңнен шықты ма? Атап шыққан мамандықтардың ішінен қайсысын ұнаттың? Кім болуды шештің?

Дымбілмес: -Иә, балалар сендердің арқаларыңда мен өте көп нәрсе үйрендім. Берген жауаптарыңыз менің көңілімнен шықты, маған ең қатты ұнағаны – ғарышкер!Мен ғарышкер болып ұшқым келеді. Мен енді достарыммен бірге «Гүлдер қалашығына» барып, өзімнің ғарыш кемемді жасауға кірісемін! Рахмет сендерге балалар!Сау болыңдар. (Дымбілмес кетіп қалады) Балалар Дымбілмеспен қоштасады.

3.Рефлексивті-түзетушілік. Мақсаты:Үлкендердің еңбегін бағалауға үйрету.

-Балалар, бүгінгі ұйымдастырылған оқу қызметі сендерге ұнадыма?

-Қандай мамандық иелерімен таныстық?

-Бізге қонаққа кім келді?

-Ұйымдастырылған оқу қызметі сендерге ұнадыма?

-Мен сендерді бүгінгі ұйымдастырылған оқу қызметінде белсенді атсалысқандарың үшін марапаттаймын!

Еңбек етсем, ертеңгі бақытыма сенемін.

Мақсатыма жеткізер уақытыма сенемін.

Достық іспен қасты да жеңеріме сенемін,

Ақыл, сана білім мен өнеріме сенемін.

Арым – таза, ақ көңіл – адалдыққа сенемін,

Абыройлы, ақ ниет – адамдыққа сенемін!- дегендей қандай маман иесі болсақ та, ел болашағын ойлайтын халқына абыройлы қызмет ететін адам болайық.

– Өте жақсы, балалар, ер жеткен соң ата-аналарың мақтан ететін, өзгелер құрметтейтін, сыйлайтын, ең бастысы елің мақтан тұтатын азамат, маман иесі болыңдар!