Эссе

«Мeн – қазіргі заманның педагогімін»

Жамбыл облысы 
Сарысу ауданы 
Донда Сенбин атындағы орта мектебінің 
бастауыш сынып мұғалімі 
Байгараева Галия Куатбековна

«Ескіден қол үзбей, жаңаға қол 
жеткізгендер ғана мұғалім бола алады» 
Конфуций 

Кез-келген адамның жүрегінде ізгілік сәулесі болса, ол – мұғалімнің еңбегі. Сол нұрды жеткіншектің жүрегіне сіңіру үшін және білім нәрін беру үшін қаншама тер төгіледі десеңізші! Дүниеде адамды тәрбиелеп, адамзат атандырғаннан артық абырой мен құрмет жоқ шығар ,сірә?!

Біз бүгін дамыған ашық қоғамда өмір сүреміз. Қазіргі қоғам балалардан жылдамдықты, ұтымдылықты, тиянақтылықты, дәлдікті талап етеді. Яғни аз ғана уақытта ауқымды білім бөлшектерін игертуіміз қажет. Өйткені уақыт талабы, заманның сұранымы солай. Сынаптай тез жылжыған уақытпен тез өзгеретін заманда қоғамына сай тұлға тәрбиелеу мұғалім еншісінде. Ұлы ағылшын ағартушысы Уильям Уорд: «Жай мұғалім хабарлайды, Жақсы мұғалім түсіндіреді, Керемет мұғалім көрсетеді, Ұлы мұғалім шабыттандырады», - деген. Ұлы ағартушы айтқандай бүгінгі оқу үрдісіне керемет және ұлы мұғалім қажет деп ойлаймын.

ХХІ ғасыр қатаң бәсеке ғасыры. Бұл ғасыр – жалқаулық пен жайбасарлықты көтермейтін ғасыр. Демек, әлемдік бәсекелестіктің жылдам дамуына ілесе алатындай білімді де тапқыр дара тұлғаның тағдыры біздің қолымызға аманат ретінде тапсырылып отыр. Бірақ та бұл тек біздің ғана қолымызда емес, жас жеткіншектердің қолында. Егеменді еліміздің ең басты мақсаты өркениетті елдер қатарына көтерілу болса, ал өркениетке жетуде жан-жақты дамыған, рухани бай тұлғаның алатын орны ерекше. Қазіргі білім берудің басты мақсаты да сол жан - жақты дамыған, рухани бай жеке тұлға қалыптастыру болып табылады.

Елбасымыз: "Біз білім-ғылым саласында бәсекеге қабілетті болмасақ, өз мақсатымызға жете алмаймыз. Барлығы мектептен, ал Қазақстан үшін ауыл мектебінен басталады”, -деген болатын. XXI ғасыр ұлттық бәсеке, ақпараттық сайыс, инновациялық технологиялар, күрделі экономикалық реформалар сияқты көріністерімен ерекшеленеді. Сол кезеңге сай интеллектуалды, дені сау, ой-өрісі жоғары дамыған, халықаралық деңгейге сәйкес білімі бар азаматты тәрбиелеу- әр мұғалімнің міндеті. Мұғалім – барлық білім беру жүйесінің негізі, жаны және жүрегі. 

Ұстаз алдындағы басты міндет - ХХІ ғасырдың есігінен еркін енетін, дүниежүзілік мəдениетті танитын, төл мəдениетін құрметтей білетін, рухани дүниесі бай, интеллектуалдық өрісі кең, білімі жоғары, білімді, жан-жақты ақпараттандырылған заман талабына сай белсенді ұрпақ тəрбиелеу. Ұстаз атана білу, оны қадір тұту, қастерлеу, арыдай таза ұстау - әр мұғалімнің борышы. Ол - өз кәсібін, өз пәнін, барлық шәкіртін, мектебін шексіз сүйетін адам.Осы іске деген қызығушылық пен сүйіспеншілік қана оны небір қиын әрекеттерге жетелейді, іске батыл кірісуге септігін тигізеді. Нәтижесінде бір емес, бірнеше жас жүрекке мәңгі ұстаз болып қалады. Біздер, мұғалімдер, күнделікті өмірдің жай ғана адамы емес, болашақты құрушыларды, адамзаттың сәулетті болашағын жасаушыларды тәрбиелеп отырғанымызды ойласақ, мұғалім мұратының қандай болатыны өзінен-өзі айқын.

Мен бастауыш сынып мұғалімі ретінде, шәкірттерім білімді болу үшін, сыни тұрғыдан ойлай алуларына, зерттеу жүргізе білуге және ойларын ашық айта білетін дәрежеге жеткенше шаршамай жұмыс істеймін. Өз сабақтарымда қолданатын әдістер мен тәсілдер заман талаптарына сәйкес келеді және оқушыларыма ұнайды. "Көптілділік" оларға қызықты, онда әрқайсысы білімдерін қазақ, орыс және ағылшын тілдерінде жетілдіреді. Соңғы ғылым жетістіктері мен видеосабақтар оларды алдағы сабаққа материалды іздеуге дайындау кезінде жандандырады.

Әр ұстаздың өз ұстанымы бар. Менің еңбек етудегі басты ұстанымым:

1.Сауаттылық – саналы жазу мен оқудың баспалдағы екенін ескеру;

2. Шығармашылық қабілет – әр оқушының зейініне байланысты жұмыс жасата білу;

Заманауи педагог – бұл рефлексивті педагог. Әрбір мұғалім үнемі өзін-өзі жетілдіріп, және рефлексия тәжірибесінде ғана бұл өсуге ықпал етеді.

"Заманға сай қадам басып барамын ба? " деген сұрақ мені толғандырады. Жаһандану дәуірінің талаптарына сәйкес келе ме? Менің ойымша «иә». Мен заманауи педагогпін. Мен өзімнің білім мен біліктіліктілігіме сенемін, әр түрлі оқыту құралдарын тиімді пайдаланамын, сабаққа дайындыққа шығармашылықпен келемін.

Ал, ең бастысы, менің біліктілігім, мен " Өз болашағымды" оқытамын!!!

Қорыта айтқанда, өз ісіне берілген, жаңалықты жатсынбай қабылдайтын, шәкіртінің жанына нұр құйып, өмірде өзі де бақытты болып, өзгелерді де бақытқа жеткізсем деп жүретін ұстаздардың жөні де, жолы да бөлек.