Мен таңдаған мамандық – Аспаз

Әр адамның өмірінде өз болашағын айқындайтын маңызды шешім – мамандық таңдау. Мен үшін бұл шешім — жүрек қалауымен, шынайы қызығушылықпен жасалған таңдауға айналды. Мен аспаз болуды таңдадым. Себебі бұл – өнер, бұл – шеберлік, бұл – жан мен жүрекпен орындалатын жұмыс.

Аспаз – адамдарға қуаныш сыйлайтын, дәм мен көркемдікті үйлестіре білетін маман. Тамақ – тек күнделікті қажеттілік емес, ол – ұлттық дәстүрдің, мәдениеттің бір бөлігі. Дәмді ас адамның көңіл-күйіне де, денсаулығына да оң әсер етеді. Сондықтан нағыз аспаз болу – үлкен жауапкершілік пен еңбекқорлықты талап етеді.

Бүгінде мен колледжде "аспаз" біліктілігі бойынша білім алып жатырмын. Бізге тағам дайындаудың теориясы мен тәжірибесі қатар үйретіледі. Қауіпсіздік ережелерінен бастап, аспаздық этикаға дейін меңгеріп жатырмыз. Түрлі ұлттық және әлемдік ас мәзірлерін оқып, оларды дайындаудың әдіс-тәсілдерін үйренудеміз. Әр тағам – ерекше туынды, ал оны дәмді әрі көркем етіп жасау – менің басты мақсатым.

Бұл мамандықтың болашағы өте кең. Мейрамханаларда, қонақүйлерде, қоғамдық тамақтану орындарында жұмыс істеуге болады. Тіпті, өз кәсібіңді ашуға да мүмкіндік бар. Ең бастысы — үнемі даму, жаңашылдыққа ұмтылу, және өз ісіңді сүю.

Менің арманым – тәжірибелі, танымал шебер-аспаз болып, өз асханамды ашу. Қазақтың ұлттық тағамдарын әлемге танытып, отандық аспаздық өнердің өркендеуіне үлес қосқым келеді.

Қорытындылай келе, мен өз таңдауыма ризамын. Аспаз болу – мен үшін жай ғана жұмыс емес, бұл – өмірлік құштарлығым. Өз ісіңді сүйіп істесең, ешқашан шаршамайсың дейді ғой. Сол себепті мен таңдаған мамандығым – менің болашақтағы жетістіктерімнің бастауы деп білемін.

— Студент: Мысықбаева Диана