Менің сыныбым

Тақырыбы: Менің сыныбым – менің ұжымым

Мақсаты:

1. Ұжымның адам өміріндегі маңыздылығын түсіндіру;

2. Өзара татулық, сыйластық қарым-қатынастарын дамыту;

3. Сыйластыққа, достыққа тәрбиелеу.

Барысы:

Ұйымдастыру кезеңі.

Біздің сынып

Жұп жазбастан жүреміз,

Біздің сынып – мақтаулы.

Өйткені біз сүйеміз

Дәйім тәртіп сақтауды.

Біздің сынып – мақтаулы.

Оқуда да алдамыз,

Біздің сынып – өнерлі.

Жақсы үйреніп алғанбыз

Талай би мен өлеңді.

Біздің сынып – өнерлі.

Еңбекке де қолы епті,

Ынтымақты дос ыңғай.

Біздің сынып – әдепті.

Біздің сынып осындай.

Біздің сынып осындай!

Аманжол Шамкенов

1. «Ой қозғау»

Әңгімелесу

Оқушыларды сабақ тақырыбына тарту үшін әңгімеле ұйымдастыру.

Бірлік, сыйластық, түсіністік, ұйымшылдық, ұжымшылдық деген ұғымдарды қалай түсінесіңдер?

Өз сыныбың несімен ұнайды?

- Жеке адамның жақсы мінез-құлқы ұжымда, көпшіліктің ықпалының арқасында қалыптасады. Сынып ұжымындағы балалар бір-біріне көмек беру, сыныптастарын ренжітпеу, көпшіл болу, ұйымшыл болу, кешірімді болу сияқты қасиеттерді бойларына сіңіруге көп мүмкіндік алады. Бір-бірімен сырласады, достасады, қуаныштарын бірге бөліседі, өздерін бақытты сезінеді.

2. «Ойланайық, пікірлесейік». Жағдаяттарды талдау.

1-жағдаят:

Сенің сыныптас құрбың спорттық жарыстан «бас жүлде» алып жеңіспен оралды. Қуанышында шек жоқ.

Оның қуанышын қалай бөлісер едіңдер?

2-жағдаят:

Сыныптасың «Білімнің биік шыңы» атты сайысқа қатысып жеңіліп қалды. Ол қатты ренжулі.

Оған қалай көмектесер едіңдер?

3-жағдаят:

Сынып балалары ылғи тәртіпсіздік жасайды. Осылары үшін кезекші сынып оларды «Кірпі» газетіне шығарды.

Осыдан кейін қандай шешім қабылдар едіңдер?

Оқушылардың ой-пікірлерін тиянақтап, қорыту.

3. Шығармашылық жұмыс.

Сабақта айтылған ойларды оқушылардың бекіте түсуі үшін тапсырма беру.

Тапсырма: Қағазда берілген бос жолдарға өз сыныбыңның үлгі етерлік жақтарын жазыңдар.

4. Қорытындылау.

Не үйрендік, не білдік ?

Балалар кезектесіп сыныптастарына тілек айтады.

-Мен сыныптас достарыма татулық тілеймін.

-Мен сыныптастарыма бірлік тілеймін!

-Мен сыныптастардың сыйластықта болуына тілектеспін және т.б.