Мұғалім – әлемдегі ең үздік мамандық

Эссе. Мұғалім – әлемдегі ең үздік мамандық

Менің ойымша, адам өмірінде қадірлеп, құрмет тұтатын мамандықтың бірі – ұстаздық. Ұстаздық ету – бұл екінің бірінің қолынан келмейді. Мұғалім болу үшін Сіздің алдымен, жүрегіңіз нәзік, қатыгездіктен ада болуыңыз керек деп ойлаймын. Өйткені мұғалім - Отанымыздың болашағын тәрбиелейтін жан. Ендеше, өзім еңбек етіп жүрген ұстаздық мамандықтың қыр-сырына тоқталып өткім келеді.

Алдымен, ұстаздық мамандықты өзімнің таңдауыма не себеп болды? Біріншіден, менің ұстаздық жолға түсуіме ықпал еткен тұлға – өзімнің алғашқы ұстазым Рыскүл Рысбековна еді. Сол адамның бойындағы асыл қасиеттері, адамгершілігі, балаға деген махаббаты, сүйіспеншілігі мені өз тұңғиығына тартып, болашақ мамандығымды таңдауға жол салды. Екіншіден, мектеп бітіріп, мамндық таңдау туралы ой болған кезде менің санамда алғашқы ұстазымның бейнесі жаңғырып, сол соқпақпен жүрсем адаспайтыныма кәміл сенген едім. Ұлы данышпан Абай атамыздың: «Ақырын жүріп, анық бас, Еңбегің кетпес далаға. Ұстаздық қылған жалықпас, Үйретуден балаға.»-деген сөздері осы ойымның дәлелі іспеттес. Сондықтан мұғалім болу – бала жүрегіне жол таба білетін, сара жол сала білетін жанға ғана бұйырар мамандық дер едім.

Тағы бір айта кетерім, мұғалімдік қызметтің қиындығы мен қызығы қатар жүреді. Сіздің жаңа идеялар мен терең біліміңіз, жаңа бағыттар мен шешімдеріңіз болашақ Отанымыздың, мемлекетіміздің дамуына өз үлесін қосары сөзсіз. Өйткені сіз тұлға тәрбиелеу арқылы болашақты жасайсыз. Шәкірт жүрегіне терең білім ұялату арқылы еліміздің кемел болашағын қалыптастырасыз дегім келеді. Мұғалімдік мамандық – менің мақтанышым. Қай саланы алып қарамасаңыз да, дамыған алдыңғы қатарлы мемлекеттерді алып қарасаңыз да мұғалімнің алдынан алған білім мен тәрбиенің жемісі дер едім.

Қорытындылай келе, әр саладағы мамандықтың бастауы – ұстаздық мамандық. Дүниенің кілті – білімде болса, білімнің кілті – ұстазда десек, артық айтқандық емес дер едім. Сондықтан ұстаздықтың ұлы жолындағы майталман мұғалімдер, білімді шәкірттеріміз көп болсын дегім келеді.

Мектеп директоры: Р.О.Бектыбаева