Бекеева Балжан Құдіретқызы
Балдырған бөбекжай-бақшасы ҚМКҚ
Музыка жетекшісі

МУЗЫКА АРҚЫЛЫ БАЛА ДАМУЫН ЖЕТІЛДІРУ

Музыка – адам жанының азығы, көңілдің кілті. Баланың тұлғалық қалыптасуында, эстетикалық талғамы мен рухани дамуының негізінде музыканың алар орны ерекше. Балабақшадағы музыка жетекшісінің басты міндеті – әр баланың ішкі әлемін музыка арқылы ашу, оның эмоциялық сезімін, қиялын, ой-өрісін дамыту.

Музыкалық тәрбие – тек ән үйрету немесе би билету емес, ол – баланың есту қабілетін, есте сақтауын, ырғақ сезімін, әсемдікке көзқарасын тәрбиелеудің негізгі құралы. Музыка сабағында бала ән айту, музыкалық аспаптарда ойнау, ырғақтық қимылдар жасау арқылы шығармашылық қабілетін дамытады.

Музыка жетекшісі балалармен жұмыс жасауда әр баланың жеке ерекшелігін ескеріп, қызығушылығын арттыруға бағытталған түрлі әдіс-тәсілдерді қолданады. Мысалы, ойын арқылы үйрету, қимылмен әуенді сезіндіру, музыкалық ертегілер мен көріністер ұйымдастыру – баланың белсенділігін арттырады және өнерге деген сүйіспеншілігін оятады.

Музыкалық іс-шаралар, мерекелік концерттер, ән сайыстары мен би қойылымдары балалардың өзіне деген сенімін нығайтады. Олар сахна мәдениетін меңгереді, ұжыммен жұмыс істеуге үйренеді, көпшілік алдында өзін еркін ұстауды дағдыға айналдырады.

Қорытындылай келе, музыка – баланың жан дүниесін байытып, шығармашылық қабілетін дамытатын, рухани жағынан жетілдіретін қуатты құрал. Ал музыка жетекшісі – сол дамуға жол ашатын, баланың жүрегіне әуен арқылы жылулық пен шабыт ұялататын тұлға.