«Педагог» кәсіби стандарты – жеке өсу үшін эталон ретінде2025 эссе портфолиоға

«Педагог» кәсіби стандарты – жеке өсу үшін эталон ретінде

№8 Т.Бегманова атындағы жббм КММ-ң

Мұғалім болу – тек мамандық емес, бұл үнемі ізденуді, өзін жетілдіруді талап ететін өмірлік жол. Педагог — бұл білім беру мен тәрбиелеу қызметін атқаратын адам. Педагогтің негізгі міндеті — оқушыларға білім беру, оларды тәрбиелеу және дамыту, сондай-ақ, олардың тұлғалық әлеуетін ашу.Өз тәжірибемде менің кәсіби өсуіме ықпал еткен бірнеше маңызды кезеңдерді байқадым.

Алғашқы жылдары мен үшін басты мақсат – оқушыларға сапалы білім беру болды. Сабақ жоспарын құру, жаңа әдістерді қолдану, әр баланың қабылдау ерекшелігін түсіну сияқты күнделікті міндеттер маған үлкен тәжірибе берді. Уақыт өте келе мен оқытудың тек ақпарат беруден тұрмайтынын, ең бастысы – оқушылардың қызығушылығын оятып, оларды дамуға ынталандыру екенін түсіндім. Мұғалімнің міндеті тек қана білім беру ғана емес, сонымен бірге шәкірт тәрбиелеу екені белгілі. Мұғалім балалардың жеке тұлға ретінде қалыптасуына, олардың моральдық және этикалық құндылықтарын дамытуға жауапты тұлға. Осы тұрғыдан алғанда, мұғалімнің міндеті тек білім беру емес, сол білім арқылы шәкірттің тұлғасын тәрбиелеу, оның өмірлік дағдыларын қалыптастыру болып табылатындығына көзім жетті.

Кәсіби тұрғыдан өсуіме ықпал еткен маңызды қадам – біліктілікті арттыру курстарына қатысу. Бұл маған жаңа әдістерді меңгеруге, заманауи технологияларды қолдануға және оқушылармен тиімді қарым-қаынас орнатуға көмектесті. Сабақтарымда интерактивті тәсілдерді пайдалану, оқушыларың өзіндік ойлауын дамытуға басымдық беру менің кәсіби шеберлігімді жаңа деңгейге көтерді. Сонымен қатар, әріптестермен тәжірибе алмасу да мен үшін маңызды болды. Бірлескен жобалар, әдістемелік кеңестер мен педагогикалық байқаулар маған жаңа көзқарастар қалыптастыруға, өзімнің күшті және әлсіз тұстарымды бағалауға мүмкіндік берді.

Оқушылармен қарым-қатынасты жақсарту да – менің кәсіби дамудағы негізгі бағыттарымның бірі. Әр бала жеке тұлға, оның қызығушылықтары мен қабілеттерін ескеру арқылы мен олардың білімге деген ынтасын арттыра алдым. Оқушымен қарым-қатынасты жақсарту — мұғалімнің педагогикалық шеберлігінің маңызды аспектісі. Жақсы қарым-қатынас орнату оқушының білімге деген қызығушылығын арттырып, оның тұлғалық дамуына да үлкен ықпал етеді. Мұғалім мен оқушы арасындағы сенімді және сыйластық қарым-қатынас білім беру процесін тиімді етіп, оқушының эмоционалды және психологиялық жағдайын жақсартады. Бүгінгі таңда мен үшін ең бастысы – тоқтап қалмай, әрдайым жаңа білім мен дағдыларды меңгеру. Өйткені, мұғалімнің кәсіби дамуы – оның шәкірттерінің болашағына салынған инвестиция. Мен өзімді жетілдіре отырып, білімді, саналы, өмірге бейім ұрпақ тәрбиелеуге бар күшімді саламын. Педагогтың кәсіби стандарты – бұл тек оның кәсіби міндеттерін орындаудың басты өлшемі ғана емес, сонымен қатар оның жеке тұлғалық және кәсіби өсуінің эталоны ретінде маңызды рөл атқарады. Мұғалім осы стандарттар арқылы өзінің білім беру саласындағы шеберлігін арттырып, шәкірттеріне сапалы білім беру мүмкіндігін кеңейтеді. Осылайша, педагогтың кәсіби стандарты оның жеке өсуіне ықпал ететін негізгі құралдардың бірі болып табылады.

Мектеп директоры : М.Амирова