Пікір-сайыс

Қазіргі жастар сыпайылық сияқты асыл қасиеттерден алыстап бара жатқан жоқ па?

Биылғы жылдың қаңтар айында №20 орта мектепте мектеп психологі Сатаева Жансұлудың ұйымдастыруымен жас мамандар арасында "Қазіргі жастар сыпайылық сияқты асыл қасиеттерден алыстап бара жоқ па?" деген тақырыпта пікір-сайыс болып өтті. Пікір-сайыс өскелең ұрпақты адамгершілікке, имандылыққа баулу, мәдениеттілікке тәрбиелеу мақсатында өткізілді. Аталмыш шараға барлық жас мамандар ат салысып, ұсынылған тақырып бойынша өз ойларын барынша ашып жеткізуге тырысты. Пікірталастың ережесі бойынша қатысушылар жеребе тастау арқылы жақтаушы және даттаушы топ болып екіге бөлінді. Ал, қазылар алқасы ретінде мектебіміздің директоры Қалдыбике Мадиярқызы бастаған бір топ мұғалімдер мен әдіскерлер, жас мамандардың тәлімгерлері түгел қатысты.

Елбасымыз Н.Ә. Назарбаевтың "Саналы да тәрбиелі, білімді де белсенді жастары бар елдің қашанда еңсесі биік, болашағы зор болады" деген сөзі бар. Қазіргі біздің болашаққа апаратын алтын көпіріміз, яғни жастарымыз қандай, олар қаншалықты білімпаз, еліміздің өркендеуі мен көркеюі үшін нендай үлес қосып жатыр, жалпы бүгінгі жастардың келбеті қандай деген сияқты сұрақтар талқыға салынып, небір сөзмергендері осы тұста өздерін көрсетіп жатты.

«Жаңғыру түп тамырымыздан басталсын»-деді елбасымыз. Ендеше, ата-бабаларымыздан келе жатқан әдет-ғұрпымызды ұмытпай, ұлы тұлғаларымыздың кітаптарын сүрлеп қоймай, жастарға насихаттауымыз керек, рухани білім нәрімен сусындандыруымыз керек емес пе? Сөз арасында даттаушы "Келешек" тобы Мағжанның өлеңдерінен, Абайдың қара сөздерінен керемет мысалдар келтіре кетті. Ж.Баласағұнның, Б.Момышұлның еңбектерінен дәйексөздер тілге тиек етілді.

Пікір-сайыс өте тартысты өтті. Сұрақ-жауап кезеніңде жақтаушы "Болашақ" тобы ұтымды сұрақтарымен көзге түсті. Қатысушылар бір-біріне сыйластық, шыдамдылық танытып, тек қана шындықты айтуға тырысты. Қызу сөз таластырудың нәтижесінде, статистикалық мәліметтер мен дәлелдерді көп келтіре білген даттаушы "Келешек" тобы жеңімпаз атанды. Екі команда мүшелері де жүлделі дипломдармен марапатталды.

Жастар – қашан да қоғамның барынша белсенді бөлігі болып саналады. Жастарды тәрбиелеуде ата-ана тәрбиесі мен діни-рухани жолкөрсетушіліктің маңызы зор. Қазақ елі сәлеміне қарай әдебін жасаған сыпайы халық, кішіпейілділікті кісіліктің төресі деп санаған халық.Ендеше, адамгершілік, әдептілік, ізеттілік сияқты асыл қасиеттерді бойымыздан аластатпау, намыс, ар деген ұғымдарды жоғары бағалау – біздің басты ұстанымымыз болу керек.

№20 орта мектептің «қазақ тілі мен әдебиеті»

пәнінің мұғалімі-Рыстаулетова Халима Еркенқызы