Қаңтар оқиғасы: жастардың жан айқайы

Қаңтар оқиғасы

Қазақ халқының тарихында ұмытылмас қаңтар оқиғасы – елдің болашағы мен бірлігіне қатысты маңызды сұрақтарды көтерген ауыр сынақ болды. Бұл күндер халықтың бір бөлігін үміттің алауына орап, екінші бөлігін қайғы-қасіретке қалдырды. Біз, студенттер, осы оқиғалардан сабақ алып, болашаққа дұрыс қадам жасауымыз керек.

Халық көшеге неліктен шықты? Бұл сұрақтың жауабын әркім әртүрлі түсіндіреді. Бірі әділдік іздеді, бірі экономикалық қиындықтарға қарсы болды, енді бірі жай ғана арандатушылардың артынан еріп кетті. Бірақ бәрінің түпкі мақсаты – еліміздің тағдырын жақсы жаққа өзгерту еді. Өкінішке қарай, бұл мақсатқа жету жолында бейбіт митингтер жаппай тәртіпсіздікке ұласып, қаншама жастың өмірі қиылды.

Қаңтар оқиғасында сарбаздар мен полиция қызметкерлері мемлекетті қорғау үшін адал қызмет атқарды. Олар туған жерін, халқымыздың тыныштығын сақтауға тырысты. Бірақ өкінішке қарай, кейбіреулер бұл жастардың қаны мен адалдығын түсінбей, оларды жау көрді. Сарбаздарды тепкілеп, қорлаған жағдайлар жүрегімізге ауыр жара салды.

Ең сұмдығы – бейбіт халықтың арасында жазықсыз жандар қаза тапты. Өз отбасыларын асырауға шыққан әкелер, болашағы жарқын болар жастардан айырылдық. Бұл оқиға бүкіл ел үшін үлкен сабақ болды. Халықтың ішіндегі ащы ашуды қолданған арандатушылар елдің имиджіне зор нұқсан келтірді.

Біз, студенттер, осы оқиғадан не үйренуіміз керек? Біріншіден, халқымыздың бірлігі мен тыныштығын сақтаудың маңызын түсіндік. Қандай жағдай болмасын, әр мәселені ақылмен, сабырмен шешуіміз қажет. Екіншіден, мемлекеттің болашағы біздің қолымызда екенін ұмытпауымыз керек. Қиындыққа қарсы тұру үшін білімді, жауапкершілікті болу маңызды.

Полиция қызметкерлері мен сарбаздардың еңбегін ұмытпайық. Олар да – осы елдің балалары, ата-аналарының мақтанышы. Олар біз үшін қызмет етіп, ел тыныштығын сақтауға тырысты. Сол себепті оларға алғысымызды айтайық.

Қаңтар оқиғасында жақындарынан айырылған отбасыларға көңіл айтамын. Олардың қайғысы – барша қазақтың қайғысы. Ал біз, жас ұрпақ, осындай қателіктерді қайталамауға тырысып, елдің бейбіт дамуына үлес қосуымыз қажет. Тек бірлік пен парасаттылық бізді алға жетелейді.

Қазақстанның болашағы – біздің қолымызда. Жаралы жүрек жазылады, тек елдігімізді сақтай білейік.

АМАНЖОЛ МАДИНА